Friday, February 23, 2007

بكرة هروح المحكمة

دي فعلا من أول تدويناتي، وأنا فعلا كنت عايز أكتب عن أي حاجة تانية، بس اعمل إيه بقا، الظروف حكمت
بكرة إن شاء الله، هاصحى الصبح اكلم أخويا حبيبي معاذ مالك علشان يعدي عليا نروح مع بعض المحكمة نحضر الجلسة الخاصة بالطعن على قرار النائب العام بتجميد أموال 29 من قيادات وأعضاء جماعة الإخوان.
طب أنا هروح ليه؟ هروح علشان بكره الظلم، وأنا متأكد إن الناس دي مظلومة، وحتى القاضي اللي هيحكم في القضية يعرف كدة كويس، بس ربنا يستر، القرار هنا سياسي. يعني ممكن يقرروا يهبشوا فالفلوس، وتولع البلد ويولع الاقتصاد عشان خاطر جيمي وزمايله، ويمكن يختشوا على دمهم، ويتقوا ربهم/ ويخافوا شعبهم، ويتلموا ويلغوا القرار
طب أنا بردة رايح ليه؟
يعني هفرق في إيه؟ بصراحة كدة ومن الاخر أنا رايح أشوف واحد وحشني
واحد بجد بحبه
مش عارف أقول أبويا ولا أخويا
أنا رايح أشوف المهندس خيرت الشاطر، اللي أنا مشفتوش من 3 شهور وفعلا وحشني
الباشمهندس مش قريبي ولا نسيبي، ولا حتى مديري ولا شغال معايا في المكتب
اللي بيجمعني بالمهندس خيرت هو عنوان المدونة دي: الرغبة في العمل من أجل مصر، وحب مصر، وحب العدل، وكره الفساد والاستبداد
آخر مرة شفت الباشمهندس كانت يوم 10/12، قبل اعتقاله بـ4 أيام
أتكلمنا في حال البلد، والفساد والظلم اللي فيها، وكان في باحثة أمريكية عايزة تقابله، فاتفقت معاه على يوم الاثنين اللي بعده علشان نتقابل معاها وأترجم لها
عرضت عليه شوية مشروعات إصلاحية، وهو قاللي وقتها اصبر شوية عالحاجات دي، عشان النظام بيحضر لضربة كبيرة
إن شاء الله هاحكي في مدونة أخرى عن هذا اللقاء
المهم الان أنه كان الأخير
بعدها بشهر ونص المحكمة أفرجت عنه، عرفت الخبر وأنا في الشغل وكنت طاير من الفرحة
الكلمة اللي كانت على لساني هي أمل كل مصري
إن في مصر قضاة لا يخشون إلا الله
بس للأسف، النظام البجح القمعي المستبد الظالم
أعاد اعتقاله من داخل قاعة المحكمة، ورجعوا بعد لما أحالوه للعسكرية يقولوا أصل الإخوان مش بيعترفوا بالقضاء المدني، قال إيه أصله وضعي
من اللي مش بيعترف؟ اللى سحل القضاة في الشارع ولا اللي وقفوا يدافعوا عن القضاة؟
إللى قدموا مئات المعتقلين (منهم عصام العريان ومحمد مرسي) دفاعا عن القضاة، ولا اللي رفضوا تنفيذ أحكامه واعتقلوا الشاطر من داخل المحكمة؟
النظام الفاسد جه هو اللي حط الشاطر في سجن المحكوم مع الحشاشين والمجرمين عشان يعكننو عليه، وهو اللي اعتقل حسن مالك علشان شريك الشاطر
أنا خرجت برة الموضوع..بش اعمل إيه بقة قرفان
بكرة هروح المحكمة، وإن شاء الله هشوف الشاطر

No comments: