Tuesday, February 27, 2007

ما يدور في رأسي

شوية كلام مالوش معنى..بس هي حاجات بفكر فيها
هي البلد دي رايحة فين؟ الاقتصاد بينهار، وسمعت من كتير من رجال الأعمال والاقتصاديين إن في مليارات خرجة مالبلد ، هو احنا ناقصين؟ ربنا يسترها مع البلد دي
كيف سيحكم في قضية الحجز على أموال بعض رجال الأعمال المنتمين للإخوان بحجة غسيل الأموال من دون أن تطلع المحكمة على أوراق تلك الشركات الموجودة في مقراتها اللي متشمعة بالشمع الاحمر؟
إذا كانت محكمة الاستئناف قد قررت الإفراج عن خيرت الشاطر ومجموعة من رجال أعمال الإخوان، وأرفقت حيثيات الحكم التي أكدت عدم وجود أية أدلة، وأكدت أن الشاطر ومن معه رجال أعمال شرفاء ومعروفين، وأكدت أن القبض عليهم لا يمكن أن يكون في مصلحة الوطن، فماذا يعني إعادة اعتقالهم ثم إحالتهم للمحاكمات العسكرية؟ قانون مين اللي بيتطبق في البلد؟ إحنا عايشين تحت قانون القوة لا قوة القانون
أنا ليه خايف أكتب كل اللي أنا عايزه؟ بجد مش عارف. أنا مش متعود أخاف على نفسي، بس بحب الحرية أوي، ماتفهمنيش غلط يا صاحبي، أنا برضه مش هبطل إن شاء الله، بس أنا بسأل نفسي؛ ليه مخي مش حر؟ أنا كتبت مقالة مرة عن عسكرة ساحات الفكر وما ينتجه من تشوهات فكرية، بس لسة عايز أعرف ليه ولغيري، كيف يتحرر العقل بشكل كامل من الخوف؟
رسائل سريعة
المهندس خيرت: والله بحبك في الله، وفعلا واحشني يا باشمهندس، ومش هنسى فضلك عليا أبدا إن شاء الله، ربنا يفك ضيقك إن شاء الله، وأنا تحت أمرك إنتا وأسرتك في أي حاجة تأمروا بيها
معاذ:أخويا وحبيبي ربنا يوفقك ويعينك وينفع بيك إن شاء الله، ويجمعني بيك دايما على خير في الدنيا والاخرة
إسلام: والله الإخوان بيحبوا مصر أوي، وعلشان كدة بنستحمل كل اللي بيحصل فيها، إحنا بنغلط ساعات، ومش دايما بنتصرف صح، بس إحنا أكيد مالناش أي مصلحة غير مصلحة بلدنا، ودي أحسن حاجة في الإخوان
د. عصام: حضرتك عارف أنك استاذي وعارف أنا بحبك أد إيه، ربنا يبارك في حصرتك وينفع بيك
أبي وأمي وإخواتي: معلس استحملوني شوية، أنا عارف إني مقصر أوي في حقكو، بس والله الظروف صعبة اليومين دول، عارف إن مالكوش دعوة، بس معلش برضة استحملوني
تصبحوا على خير

2 comments:

Anonymous said...

الله ينور عليك يا ابراهيم انت من الذين لديهم همم عالية و الشجاعة ليست جديدة عليك و الحذر ضرورى " أصل لو كل الشرفاء دخلوا السجون فمن سيبقى لنا خارجة " تكفى تدويناتك
تعبيرا عن شجاعة عقلك و لا تقلق من مسألة الخوف ......رد فعل طبيعى من الحالة المتدهورة و لغازم نتعدى كلنا منها و لكن حمدا لله عدوتك خفيفة احمد ربنا

Anonymous said...

أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى مني أنا
أخرس ولكن قلبى مليان كلام
عجبى