Sunday, March 18, 2007

رسالة حب من الحكومة لأبنها المواطن

ده شعر لقيته عندي عالميل مش عارف مين اللي كتبه عزيزى المواطن بتاع النضال يا راكب دماغك و غاوى الحلال نصيحة يا صاحبى بلاش الخيال و غمض عيونك و ربى العيال بلاش المناكفة و لايم و عيش هتتعب معانا و سهمك يطيش نلفق للاهلك قضية حشيش و تصبح حكاية و نكتة و مثال: تعالى و هاودنا و عدى الامور و عيش فى الطراوة و خش الطابور لكن لو هتزعل و دمك يفور هنشهد نهايتك فى بحر الرمال هتصبح حرامى هتصبح امير هتصبح حرامى و ندل و اجير و نقدر نلخبط فى اصلك كتيير و جدك شحاتة هيصبح شحال هنحلف ان الحبايب شافوك بتقبض يا خاين و تقتل اخوك ساعتها مراتك هتلعن ابوك و تلطم و تنعى احط الرجال مالكش انت دعوة بى اا اللى ضاع و مين اللى شارى و مين اللى باع و مين اللى كيل و مين اللى شال فحب الحكومة و حب السلام و علم ولادك يشدوا الحزام علشان بكرة هياكلو حمام و ينسوا الاسية و ينسوا الهزال فلازم يا صاحبى تغمض عنيك و طنش علينا نطنش عليك و اياك تشاور نقطع ايديك و تصبح مواطن ما يسواش ريال عزيزى المواطن بتاع النضال يا راكب دماغك و غاوى الحلال نصيحة يا صاحبى بلاش الخيال

5 comments:

Anonymous said...

والله انا شايفة احنا نقدر نعيش كويس جدا بس بشرط ان نضيع شرفنا ونعيش حرامية في البلد دي ولو كنت خايفة علي الاولاد(وليخش الذين لو تركوا من خلفهم ذرية ضعافا خافوا عليهم فاليتقوا الله وليقولوا قولا سديدا)فاحنا مش هنبطل
هاجر

أروى الطويل said...

اه والله بلاش الخيال
دى حاجه تطقق

بنــات العـــــــريان said...

اظن ان الشعب مش محتاج الكلمات دى لانه نايم لوحده ومش مستنى تهديد

والناس الصاحيه ربنا يثبتهم ...المفروض ان الحكومه فقدت فيهم الامل

سميه العريان

ياسر أبو العلا"صحفى -آفاق عربية" said...

الله ينور يا عم ابراهيم ،مدوزنتك جميلة ،دى اول مرة ادخلها ،والله الواحد سعيد جدا اننا بدانا ندخل الحلبة دى وننافس بقوة ،اوعوا تسيبوا النصابين يكتبوا زى ما هما عاوزين ومحدش يرد عليهم ،لازم كل كلمة مغلوطة تلاقى قدامها كلمة حق ،اوعوا السكوت .

Sanaa El-Banna said...

القصيدة دى لأحمد فؤاد نجم
لكن رائعة
وإيقاعها منضبط الى حد كبير
بوركتم