Wednesday, March 21, 2007

عيد الأم

الأيام اللي فاتت الواحد حس إنه مش عارف يفرح
يعني الأهلي كسب والزمالك خسر وبرضه مافرحتش
أصل حال البلد بيكي...إن كان الاعتقالات ولا التعديلات الدستورية (أو الانقلاب الدستوري) ولا موضوع العبارة اللي جابته العاشرة مساءا ولا موضوع اللبن الفاسد..كله هم
وحتى لو عايز أفرح، ممفيش وقت
الشغل والمواعيد والكتابة مش مخلية الواحد عارف يتنفس
بس في أوقات الواحد لازم يقف ويسيب كل حاجة
ويحاول يسعد ناس طول عمرهم بيحاولوا يسعدوه
والنهاردة يوم من الأيام دي
النهاردة عيد الأم
كل سنة وانتي طيبة يا أمي
ياللي مستحملاني كدة وانتي ولا بتشوفيني ولا عارف أقعد معاكي
بس النهاردة مش عيد أمي بس
النهاردة يوم كل أم وكل زوجة شريفة
غاب عنها زوجها بسبب الاعتقال الظالم
النهاردة يوم زوجات المعتقلين زوجات خيرت الشاطر، وحسن مالك، وعبد الرحمن سعودي، ومحمد حافظ، وأيمن عبد الغني، ومحمد بشر، ومدحت الحداد، وأحمد أشرف، ومحمود أبو زيد، وأحمد شوشة،وأحمد عز الدين، ومحمود المرسي، وجمال شعبان، وأمير بسام، وعصام حشيش، وضياء فرحات وغيرهم من أهالي المعتقلين
فكرت كتير ايه اللي ممكن أعمله لإدخال السرور على قلوبهم ومحاولة التخفيف عنهم بعفي الأيام الصعبة اللى هم عايشينها وكلنا عايشينها معاهم
فكرت أجيبلهم ورد
بس بعمل إيه الورد لما يكون الأهل معتقلين
فكرت أكلمهم أعيد عليهم، بس معيش أرقامهم
مالقتش غير حاجتين اللي ينفعوا:
أول حاجة أقولهم كل سنة وانتو طيبين، وأعرفهم إنهم لو عايزين أي حاجة أنا تحت أمرهم
وأوعدهم إننا كلنا مش هنبطل نشتغل لغاية لما أهلهم يخرجوا ويرجعو بيوتهم
تاني حاجة إننا نقول لأولادهم يحاولوا يسعدوهم النهاردة مش عارف إزاي بس يحاولو
يخرجوهم...
يجيبولهم هدايا...
يذاكروا...
مش عارف
كل واحد يعمل اللي يقدر عليه
والله الواحد مكسوف وهو بيكتب الكلام دة
ومش عارف يقول إيه لأهله المعتقلين
بس ربنا معاكو أن شاء الله
فإن مع العسر يسرا، إن مع العسر يسرا

3 comments:

Anonymous said...

كل سنة وكل ام بالف خير وخاصة امي ياحج ابراهيم انا كان ليه تعليق علي كلامك انت ازاي اصلا تتشغل عن امك بتقول علشان انا مشغول اقول لك انت لو حطتها من ضمن مواعيدك واي حد يتصل بيك في الوقت ده تقوله والله انا مش فاضي عندي شغل مهم جدا ومينفعش اسيبه او قوله انا معاد دلوقتي وما ينفعش اخرج يعني زي ما بنقول في حاجات كتير علي العموم انا بقول الكلام ده لنفسي كمان علشان انا حقيقي مقصرة مع امي
بحبك يا امي هاجر

Anonymous said...

Since the referendum is on Mon. 26, you only need ur national id to vote and nothing else. It probably won't make a difference, but at least we tried what we can. Vote and to not let those ammendments pass!

Anonymous said...

أمي يا أمي الحبيبة
نبع الرياحين والورود
أين ابتساماتك الرطيبة تشدو باشراقة الوجود
ولاسم أمي الجميل لحن في القلب أحلى من النسيم
لا وجه لاح فيه حسن يرقى إلى وجهها الكريم
مالي إلا وجهك العظيم أحيا به الوعد بالنعيم
روحا بأرجائه أهيم.. طفل بأحضانه أعود
أمي وهل لي سوى يديك ارجوهما من ندى السماء
أبوابها طوع راحتيك إن تسألا يسمع الرجاء
يا من حنا باسمها النداء يا من تسامى بها العطاء
إن رمت جودا من السماء من غير نعماك لا تجود
أماه يا أنشودة الخلود