Sunday, March 25, 2007

ولسة ياما..ياما ياما ياما

الحزب الوطني (وهو أبعد ما يكون عن الوطنية) يذكرني دائما بأغنية الأستاذ محمد منير في فيلم المصير
ولسة ياما...ياما ياما ياما...في عبنا (عبنا دي من عندي) قوللي ليه
أقولك يا سيدي أصل الواحد صحيح عارف أنهم ناس فاسدين؟ طب وإيه الجديد؟ لأ في جديد طبعا
الجديد المرة دي لا ينتهي
من يفط في الشارع لنواب الحزب تدعو للمشاركة (من أجل التعليم المجاني) !! تعليم مجاني إيه يا بهوات؟ فين ده
وإيه التعديل اللي بيتكلم على التعليم المجاني
نائب محشش برضه بيقول من أجل الحرية
حرية دي واحدة طنط كدة صاحبة نزيهة وشريفة المصريين كلهم بيسمعوا عنهم ونفسهم يشوفوهم، أصلهم بيقولوا عليهم حلوين والله، بس هما مش بييجوا
اللي قاعدين هنا (والحزب الوطني والنظام الفاسد مستضيفنهم على طول) هما طنط فيفي بتاعت الفساد، وطنط زيزي بتاعت التزوير، وطبعا الخالة تيتي بتاعت التعذيب والتلاتة ريحتهم زي الزفت بس النظام طول النهار واخدهم في حضنه منظر مقزز جدا هما دول اللي بيأكلوه ويشربوه ويعيشوه بس يللا ده مش موضوعنا واحد نائب بشورت وعلم وصفارة في اسكندرية قال للشعب اللي هاينزل ينتخب هيروح ماتشات الاتحاد والاولمبي ببلاش، طاب كان استنضف وجاب الناس ماتش مصر طيب بلاش مصر (أصلهم مش بيحبوا البلد دي) يجيب الناس ماتش الأهلي، وأهو برضه الريس أهلاوي، بعني هتعجبه الحركة دي نائب تاني لطيف برضه قال نعم للتعديلات من أجل مراقبة الحكومة أنا مفهمتش، بس لو حد فهم يقوللي الحاجة الوحيدة اللي ممكن افهمها من التعديل ده إنه بيشجع النظام يراقب المواطن يعني مراقبة النظام للمواطن وطبعا المواطن اللي هيتراقب في بيته ومع أهله وفي تليفونه وفي الشارع ووهو نايم ووهو في الحمام ووهو بيستحما ده مش هيكون وزير ولا محافظ ولا مسؤول في الدولة ولا عضو في الحزب الوطني لا أي حد من اللي بيتصرفوا (طبقا للدستور) في أموال الشعب والممتلكات العامة لأ دا هيبقى المعارض اللي بيحاول يعمل أي حاجة علشان يصلح البلد هيطلع عين أهله ومش بس كدة كل حركة هيعملها ضد النظام هيتقال عليه إرهابي وهيلا هوب عالمحكمة العسكرية وبسرعة عالسجن ولا من شاف ولا من دري بس برضه ده مش موضوعنا دلوقتي نائب كان قاعد عند خالته وكلمته عن أزمة الأسعار والميزانية في بيتها، عجبته القضية وكتب يقول نعم للتعديل من أجل مراقبة الميزانية...المهم خالته عجبها الكلام وهتجوزه بنتها إن شاء الله دول نواب الحزب تعالى بقة أكلمك شوية عن الراديو وأنا في الطريق للشغل سمعت طنط المذيعة بتقول لازم نشارك ونقول أه علشان يبقى في ديمقراطية، وكلنا نطلع في الصورة بتاعت الأستاذ عبدالحليم، الراديو طلع تراب من كتر ما الكلام دة بيتقال التليفزيون برضه حملة من بتوع أيام الفراعنة كدة، الفرعون هو الحل يعني واخترناه وبايعناه ونافقناه وجاملناه والله معاك ومعاك قلوبنا الجديد الجديد بقه الصورة اللي فوق خالص دي الناس هتاخد حضورها وانصرافها بكرة من اللجنة مش من الشغل حبيبتي يا مصر والله يا غالية عليا بس برضه الناس مش هتروح أصل الموضوع بسيط أنا لو حاسس إن صوتي هيتعد، أو هيفرق، أو إن عندي فرصة أشرح للناس أضرار التعديل كنت رحت بس على رأي الأستاذ حسين إبراهيم: الحزب الوطني كان بيكلم نفسه المعارضة كلها خرجت والتعديل ده برضه تعديل الحزب الوطني اللي خرب البلد، وبيخرب البلد، وهايخرب البلد ونرجع ونغني ونقول الكلام ده...الكلام ده خطير الكلام ده...مش هيكون الأخير علشان الكلام الأخير هيكون للشعب وساعتها اللي في بالي هيغني حسرة عليها

5 comments:

yamen said...

تعرف يا ابراهيم

برغم اني ناوي انزل بكرة ان شاء الله واقول "لا" لمجرد اني ماسيبهاش تعدي كده من سكات يعني..
بغض النظر عن اذا كان الصوت ده هايتسمع او لا ..
انما انا اصلا موضوع تعديل الدستور ده بيني وبينك مش فارق معايااوي..

يعني هي الحكومة يعني كانت بتلتزم بالدستور قبل التعديل لما هاتلتزم بيه بعد التعديل..
ياسيدي انا موافق ان دستورنا يكون اظلم الدساتير في الدنيا بس يكون هو الفيصل الحقيقي بينا..
و ساعة لما الحكومة تلتزم بالدستور مهما كان ظالم ساعتها نبقي نقول نعدل ديه ونشيل ديه

اشوفك علي خير

Moustafa said...

يوم الاثنين فيه استفتاء على تعديل 34 مادة في الدستور المصري دستور
بلدنا اللي بيقول البلد تمشي إزاي وبيحدد حق وواجب كل واحد فينا,
التعديلات دي الحزب الوطني عملها بمعرفته .. تعديلات تفصيل على مقاس
جمال بيه , عشان محدش يتكلم أو يعترض أو يطالب بحقه أو يرفع راسه , مش
كدة وبس كلنا هنكون مهددين في الشارع وفي شغلنا وبيوتنا وأكل عيشنا .
تعديل المادة 179 بيدي الحق لأي أمين شرطة إنه يدخل بيتك ويفتشك
ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير
إذن نيابة ولا دياولو وبعدين يوديك محكمة عسكرية لأنك إرهابي ؛ يعني
مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا
قانون , وكله بالدستور يا بيه !

أما بقى تعديل المادة 88 فده بيلغي الإشراف القضائي على الانتخابات
ويسيبها للداخلية وبتوع " نعم نعم يا مبارك " يطلعوا النتيجة اللي هما
عايزينها . التعديلات كمان هتمنع أي مستقل يترشح للرئاسة
يعني انكتب علينا وعلى ولادنا رئيس من الحزب إياه لحد ما نموت , ورئيس
الجمهورية بقى من حقه يحل مجلس الشعب من غيرحتى ما يستفتي الناس ؛
يعني احنا ننتخب مجلس شعب هو ييجي يحله من دماغة ويطلعلنا لسانه .

يعني من الآخر البلد هتبقى عزبة مبارك وولده , واحنا عبيد وأنفار
عندهم مالناش حقوق وكتّر خير ناظر العزبة إنه سايبنا قاعدين .

احنا بقالنا كتير بنتكلم عن الحرية والديمقراطية وحقوق الإنسان
والشفافية وتداول السلطة والنهب والفساد والقطارات والعبارات والسرطان
والعنوسة والبطالة والفقر والجهل والمرض و عندنا استعداد نفضل نتكلم
ونحاول تاني وتالت , بس التعديلات دي هتحرمنا حتى من أبسط حقوقنا كبني
آدميين وهو حق الكلام والتعبير, الموضوع مش المعارضة والناس بتوع
السياسة بس , الموضوع هيضرنا كلنا , أي حد هيفتح بقه دلوقتي ممكن يبقى
إرهابي مفيش حرمة ليه ولا لبيته وعرضه وحريته وكرامته , من حقنا نكون
زي كل شعوب الدنيا اللي واخدة حقها والحكام بيشتغلوا موظفين عندها ,
من حق ولادنا يعيشوا في مصر أحسن
من اللي احنا عشنا فيها , كل واحد فينا هيجيله يوم يسأل نفسه أو ولاده
هيسألوه كان فين يوم ما البلد اتباعت وبقت تكية لمبارك والعصابة اللي
معاه ؟!

دي آخر فرصة نتكلم واحنا لسة بني آدمين نرفض الاستعباد والذل اللي
عايزينا نعيش فيه , يمكن تكون دي آخر مرة نقدر ننزل الشارع فيها نعبر
عن رأينا ما هو بعد كدة اللي هيتكلم هيبقى إرهابي .نرجوك بكل عزيز و
غاليتعمل حاجة من الاتنينيا تروح تقول لا في الاستفتاءيا ماتروحش
خالصابنك و بنتك و امك و ابوك و اخوك و اختك ما فيش حد فيهم ماتهزأش
من عسكري او ماتعرضش حتي للمضايقة من ضابطهايبقي ايه النظام لما ده
كله يبقي دستوريماحنا لو بنثق في البوليس و انه بيعامل الناس
باحترامكان معلشوطبعا مش عاوز اقولوكم انهم في التلفزيون بدأوا حمله
غسيل الدماغ" و مصر هي ماما خضرا لون البيجاما "

يوم الأحد 25\3 الساعة 6 هنكون كلنا في ميدان التحرير , كل الأحزاب
والتيارات والاتجاهات , رجالة وستات , ولاد وبنات , هنبات ليلة في
الشارع نقول كلمتنا ونوصل صوتنا ونبقى
عملنا جزء من اللي علينا قدام نفسنا وولادنا وقدام ربنا , مهما يعملوا
هننزل الشارع ومش هنخاف ومش حنسيب بلدنا عشان احنا أصحابها

We Lanna ALLAH

Anonymous said...

SA
Ibrahim u know that i really love u fi allah so plz I ask u not to do that coz u can help in changing this society, even if u think that cairo cannot be a starting point for a better world but we've to work

Islam maher said...

اعتقد ان أبسط تعليق على كل اللي بيحصل ده هي رسالة جاتلنا في البرنامج تعليقا على احدي الحلقات حول التعديلات بتقول : انتوا زعلانين ليه ومضايقين ليه هو مش الدستور ده بتاعهم"يقصد الحزب الوطني طبعا"متسبوهم يغيروه هما حرين يا جماعة ده دستور الحزب الوطني ده انتوا غراب قوي سبوهم قلتلكم بتاعهم

Anonymous said...

بعد ازنك ياعم ابراهيم انا عايز الايميل بتاعك عشان انا عايز اسالك عن شوية تفاصيل كده انا معجب جدا بالمدونة لكن ليا بعض استفسارات ياريت ترد عليا من غير تنفيض ومن غير ماتسيح وتقعد تشتم زي واحد طلبت منه الطلب ده وسيحلي في المدونة وقعد يتريق انا بحب طلاب التيار الاسلامي وياريت ماغيرش فكرتي عنهم
انا ايميلي
omarelmokhtar_1001@yahoo.com