Wednesday, March 28, 2007

بالتعيين

كنت بفكر في حاجة كدة النهاردة عن طبيعة النظام
بعدين في جلسة عائلية كدة حد كان بيقول (إحنا إزاي عندنا في الكلية سامحين إن العميد يكون متعين مش منتخب)؟
قلت يعني هي جت عالعميد؟
النظام المصري نظام مقلوب 180 درجة
أي نظام في العالم القاعدة بتنتخب القيادة، بس في أم الدنيا وعاصمة العروبة، وخصوصا مع أعراس الديمقراطية اللي كترت أوي الفترة اللي فاتت (صحيح؛ هو إزاي ده حثل؟ هي متجوزة كام؟ ولا بتطلق؟ ولا هما كل مرة يكتشفوا إن العقد كان أصلا باطل ومافيش عرس ولا جواز؟ يللا مش مشكلة دة مش موضوعنا) كنت بقول إيه؟؟أه..مع النظام المصري دايما فيي جديد، أو زي ما قلت في تدوينة سابقة: ولسة ياما..ياما ياما ياما
النظام في مصر مثلا بيعين العمداء في الكليات
مش بس كدة...دة بيعين رؤساء الجامعات، رغم إن الدستور صريح في موضوع استقلال الجامعات..الدستور..الله يرحمك يا دستور..قصدي يعني أيام لما كان بلدنا فيها دستور
النظام برضه بيعين كل حاجة ليها دعوة بالدين في البلد دي
شيخ الأزهر بالتعيين
المفتي بالتعيين
وزير الأوقاف بالتعيين
ودول بيعينوا أئمة المساجد
وعمداء الكليات عندهم
وبعد كدة ييجي واحد منافق ومستعد يبوس أي جزمة علشان يبقى رئيس تحرير، سواء بقى كان في الأهرام ولا الأخبار ولا روز اليوسف يقول أصل الإخوان بيحتكروا الدين
هما الإخوان عارفين ياخدوا شقة كبيرة شوية لمكتب الإرشاد علشان يحتكروا دين
لأ والأحلى بقى: النظام يحط دستور يمنع ممارسة أي نشاط سياسي على أساس ديني، وعلشان يضحك عالناس وينزلهم الإستفتاء يجيبلهم شيخ الأزهر والمفتي والبابا
واحد منهم "يحث" أتباعه لا فقط على التصويت، بل على التصويت لصالح التعديلات
والتاني بيتكلم عن المشاركة باعتبارها نوع من أنواع الشورى
والتالت بيقول المقاطعة كتمان شهادة وبعدين يقولوا بلاش ندخل الدين في السياسة
هو الدين اللي بيدخل في السياسة، ولا السياسة اللي بتدخل في الدين
المهم رد المستشار البشري عليهم أسكت وقطع الألسنة
أنا قريته على مدونة إنسى (http://ensaa.blogspot.com)
قال قرار المقاطعة دة قرار بصوت عالي وشهادة مسموعة، فكيف يعتبرها البعض كتمان شهادة
أنا مش قلت من الأول، أنا بحب المستشار البشري
نرجع لموضوع النعيين
علشان أختصر: اللي بيضايق النظام بيعين غيره
مش عاجبه نادي القضاة؟ في المجلس الأعلى للقضاء
مش عاجباه نقابة الصحفيين؟ في المجلس الأعلى للصحافة
وهكذا
الجديد هنا هو اللي حصل في الاستفتاء المشبوه (على فكرة القضاة قالوا 2% بس اللي راحوا) إيه اللى حصل في الإستفتاء؟
طول عمرنا نعرف إن أحزاب المعارضة هي الوفد والناصري والتجمع وزاد عليهم الغد وبعض الناس بتحسب الكرامة رغم عدم حصوله على الترخيص باعتبار أنه حصل على ترخيص من الشعب بوصول نوابه للبرلمان، بالإصافة طبعا للإخوان اللي هما قوة المعارضة الرئيسية
والنظام دايما علشان يتجاهل الإخوان بيروح للناس التانية (الوفد والناصري والتجمع تحديدا) بس المرة دي حصلت حاجة غريبةأوي
لما الأحزاب دي قررت تقاطع الإشتفتاء النظام اعتبر إن المعارضة الرئيسية هي الأحزاب التانية اللي قررت تشارك، طبعا أنا مش فاكر أساميها دلوقتي، بس مش مهم مش هاشغل ذاكرتي بحاجة مالهاش لازمة
المهم هنا إن الأحزاب اللي لو قلت عليها ورقية هابقا بجاملها دي النظام عينها "معارضة" وكأن المقاطعين راحت عليهم نومة يومها بس
أخشى ما أخشاه إن النظام يتخنق من الشعب الأيام الي جاية لأن الناس قاطعت الإستفتاء، فيقرر تعيين شعب آخر ونتوه إحنا في الصحراء الغربية
وده شكله بيحصل
يعني اللي بيقرا الأهرام مثلا هايلاقي إن النظام عين شعب ينزل ينتخب، ودخله لجان كتيرة قوي علشان يستبدل بالمجموعة الصغيرة دي الشعب كله
يا جماعة لو أنا اتلغيت من الشعب إن شاء الله الإيميل هيفضل معايا، فلو حد عايز حاجة أنا تحت أمره

7 comments:

Anonymous said...

SA
7elwa de ya Hodz

take care my bro

Islam said...

طيب ولو الايميل اتلغي هتعمل ايه ؟حلوة قوي يا ابراهيم برافو عليك انت خسارة في ال........

الكواكبي said...

ملعوبة يا ابو خليل
بس اوعى الميل يتهاك تبقى مالكش ورق ولا ضمان وهايبقى البدون بتوع الكويت احسن منك . . على الأقل هما عارفين انهم بدون

Anonymous said...

متهيألي خلاص هنبطل ياابو خليل
انا كنت مع رجالة الازهر ولسه طالعين من شهر
متهيالي هنبطل شقاوة يابو خليل ونرجع لدار الارقم تاني

Anonymous said...

نقلا عن مدونة ابراهيم ..... المصرى اليوم نقلت عن مدونتك من هذة التدوينة يوم الجمعة اللى فاتت ما شاء الله (:
يا ترى قرأتها

sondos said...

elmawdo3 da ana lessa mfakara fe bardo, 2asdy ya3ny internal democracy fel egyptian institutions. ana masalan fe sana rab3a gam3a w mar 3ala ta3'yeer lel3ameed w ta3'yeer le ra2ees elkesm beta3y, w tab3an ana rafdahom eletneen and most students do w tab3an elfasad maly elkoleya wel kesm, fa sa3etha fakart en eldawla eldemocrateya en3ekas le mo3assasat democrateya, and we will never reach a truely democratic regime unless the principles of democracy are practiced in all our national instituions

sharkawoo said...

لو كان الأمر فقط علي التعين لكان الأمر يسيراً ولكن التعين من أجل دواعي أمنيه هنا يختلف الأمر ..

بس قد يكون هناك عيب كبير وخطير من النظام ولكن صدقاً هنا مشكلة فينا كشعب في كوننا لم نتعود في يوم علي التعامل بمبدأ الشوري إلا علي نطاق معين ..

تقبل تحياتي :)