Tuesday, April 17, 2007

تدوينة أبكتني: الله يسامحك يا مجدي

قرأت تدوينة من عند مجدي أبكتني بجد
ودا تعليقي عليها:
الله يسامحك يا عم مجدي أبكتني وأنا في الغربة
طبعا بحب بلدي وصعبانة علية أوي من اللي هي فيه
البلد دي مالناش غيرها ومالهاش غيرنا
مش عارف إيه اللي ممكن أقوله
بس أكيد الواحد أحيانا بيزهق
وأحيانا بيتعب
وأحيانا بيحس إن القلق معطله
أحيانا بيحس إنه عايز يسافر شوية
بس عمره ما بيحس إنه بيكره مصرأبدا
والله لو ماكناش بنحبها ماكناش استحملنا كل اللي بيحصل فينا عشانها
والله لو ماكناش بنحبها كنا رحنا عشنا في حتة تانية فيها حرية وكرامة أكتر
بس علشان بنحبها، هنعيش فيها
الشاطر واخوانه علشان بيحبوها بيدفعوا من حريتهم تمن حريتها
ومن عمرهم تمن حياتها
منعم عشان بيحبها مستحمل يقعد في السجن وقلبه محروق على ابوه
قصاص عشان بيحبها دخل السجن مش عارف كام مرة عشان واقف قدام الناس اللي بيظلموا أهلها
أنا برة مصر دلوقتي في شغل، وإن شاء الله هرجع بعد كام يوم
بس فعلا نفسي أرجع أبوس إيد كل راجل كبير ماشي في شوارع مصر أنهكته الحياة
وكل واحد اتضرب في مظاهرة تطالب بحقوق الشعب
وكل قاضي رفض يخون ربه وضميره وحقوق شعبه وأصدر حكم نزيه في مواجهة ظالم
وكل برلماني واجه الفساد ورفض التعديلات الدستورية رغم الضغوط
وكل ناظر مدرسة وقف الطلبة في طابور الصباح
يغنوا بلادي بلادي لك حبي وفؤادي
وكل صحفي قال كلمة حق ونشر كلمة حق وماخافش من حد ولم يغره بريق السلطة والنظام
وكل أم علمت ولادها إن حب البلد مش كلام، وإن حب البلد تضحية وبذل لإصلاحها
بجد وحشتيني يا مصر

13 comments:

همسة قلم said...

لا تعليق على التعليق

:(

motf2la said...

يااااه لو كل الناس بيحبوا مصر بشكل ده وبروح دي وبلإنتماء ده مش هيبقى في حاجه وحشة لا الشاطر في المعتقل ولا بودرة السيراميك في اللبن ولاالألفلونزا في الطيور ولا ولا ولا... ولكنها سنت الحياة فيها من يحب الخير لبلده ومن يكيد المكائد لها ولكني يكفيني حبا لها ان بها خير أجناد الأرض اللهم اجعلنا جنداً من هؤلاء الجنود
بحبك يا بلدي

Zanaty said...

مش معاك فى كلامك و أظن أحمد مطر أحسن واحد يعبر عن رأيى
===================
تف على هذا الوطن!


وألف تف مرة أخرى!


على هذا الوطن

من بعدنا يبقى التراب والعفن

نحن الوطن !


من بعدنا تبقى الدواب والدمن

نحن الوطن !


إن لم يكن بنا كريماً آمناً

ولم يكن محترماً

ولم يكن حُراً

فلا عشنا.. ولا عاش الوطن!
==================

محمد السيد said...

أنا إخوان ... الكلمة هي السر وهي السبب ... وإذا عرف السبب بطل العجب ...
أنا إخوان ... من الجامعة إلي التخرج إلي الإعلام إلي الصحافة إلي كل ما له علاقة بالإعلام ...
أنا إخوان ... في المظاهرات وفي النيابة وفي المحاكم وفي مباحث أمن الدولة وفي سجن المزرعة بطرة ...
أنا إخوان ... كانت مدونته تقولها بوضوح ... وللأسف كانت في نظر نظام بلده هي جريمته ... لكن له كانت شرفه وعزه ...
كان الخبر كالتالي ...
"قامت قوات مباحث أمن الدولة في ساعة مبكرة من صباح اليوم الجمعة بمداهمة منزل المدون والإعلامي المصري عبد المنعم محمود الصحفي بموقع الإخوان بالإنجليزية ومراسل قناة الحوار البريطانية بمصر ولم يكن وقتها موجوداً بمنزله . "
ولمن لا يعرف مين هو "منعم" مثلما كنا نناديه ...
"عرف بين الصحافيين والناشطين السياسيين بلقب " رويتر الإخوان " أحد أبرز شباب الإخوان المعنيين بالشأن الإعلامي وأحد الأوائل الذين بدأوا نشاط التدوين الإخواني ويعود إليه الفضل في لفت أنظار الكثير من مدوني الإخوان الحاليين إلي هذا المجال وتعد مدونته " أنا إخوان " أحد أبرز المدونات العربية في الوقت الراهن ."
وكان ردهم اعتقاله .... وبالتالي نتقدم إليهم بردنا ....
مدونو الإخوان المسلمين .... واعترافا منهم بفضل "منعم" عليهم ... واعترافا منهم بجهد كل مدون قال كلمة الحق في وجه الظلمة ... وتواصلا مع مسيرتهم .... يقررون ما هو آت ...
باسم العشرات بل المئات من مدوني الإخوان المسلمين ....
منهم الشباب والشابات.... منهم الرجال والسيدات والأطفال ...
منهم الأسر اللي اعتقل عائلها .. ومنهم الكثير اللي غيب أحبابهم وراء القضبان ...
الكلمة اللي أقسمنا نحميها ونقولها ونعلنها ...لن يوقفها سجن ولا معتقل ولا محكمة ...
الصوت اللي خرج من وسطنا ... لن نسمح له إنه يسكت أو يضعف أو يتردد أو يرتعش ...
المدونات اللي كتبت حكايتنا وأيامنا ...خواطرنا وأفكارنا ... يوم بعد يوم حتزيد وتكبر...وتوصل لكل الناس ...
إحنا اخترنا خطابنا يكون بلهجتنا ... وبلغتنا ... عشان يوصل باسمنا ويعبر عننا ...
واخترنا نوصل رسالتنا لكل الجهات ... للفضائيات والجرائد والمجلات ولكل الكتاب والصحفيين ... وقررنا ننشرها في كل المنتديات ... والمدونات ... والمواقع ...
حملة من أجل البلد دي ... حملة ضد السكوت والخضوع والخرس, ضد الاستسلام والسلام والهوان, حملة نرفض بيها القضايا المتلفقة وشهداء الزور وأدعياء الثقافة والكتبة اللي كتابتهم كلها تحت أمرالنظام وأسياد النظام .
وفي إعلانا هذا لا نفصل أنفسنا عن باقي المدونين أو تجمعا خاصا مقتصرا علينا ... بل علي العكس نتقدم فيه بالشكر كل الشكر لكل من ساعدنا في دنيا التدوين, ونعترف له بالسبق والفضل, وكم أسعدتنا صورة "عبد المنعم محمود" وهي تملأ عشرات المدونات متضامنة متكاتفة مساندة ...
- كلنا إخوان ...رغم السجون والمعتقلات والقضايا والمحاكمات ...
- كلنا إخوان ... فكرة آمنا بيها وضحينا عشاناها ومستعدين نبذل لأجلها كل غالي وثمين ...
- كلنا إخوان ... طريق اخترناه ورسمناه ... وكنا عارفين إنه صعب وشائك ومليان بالصعاب ...
- كلنا إخوان ... وتراب البلد ده بنحبه وبنموت فيه ... وأحلي أيامنا يوم ما نشوفه حر وعزيز ...
- كلنا إخوان ... وبنحب أهلنا وجيرانا وإخوانا ... وعشانهم نعمل أي شيء ونضحي بكل حاجة ...
- كلنا إخوان ... برغم كل اللي ظلمنا وحبسنا ...وبرغم كل اللي سكت علي اللي بيجري لنا ... وبرغم كل اللي حرض وتآمر علينا ...
نقدر نقولكم مش حنسكت و مش هنبطل ... لسانا هو أساسنا ... غرباء؟ ممكن ... لكن حنفضل من الناس ...
بنحب النور وبنحب البلد دي ...لأنها بلدنا ... وبنحلم لها بالحرية ... ألم الوطن ألمنا كلنا ... وشايفين فيه أحلي ما في الدنيا ...
وفي الختام :
1- نطالب بالإفراج الفوري عن عبد المنعم محمود وكافة معتقلي الرأي في مصر.
2- نطالب المنظمات الدولية لحقوق الإنسان ومنظمات المجتمع المدني بإدانة الإنتهاكات الصارخة لحرية التعبير في مصر
3- نرفض التعامل الأمني مع قضايا الرأي والنشر الصحفي والإلكتروني
4- نؤكد على تضامننا الكامل مع مجتمع المدونين على مستوى العالم في حرية التعبير عن الرأي بكافة وسائل النشر المتاحة.
وفي النهاية ... كلنا إيمان عميق... بأن الحق منتصر وأن الصواب هو الحقيقة الوحيدة ... وأن لكل فجر ظلمة تسبقه ولكل نصر تضحيات ترسم خطاه .

مدونو الإخوان المسلمين

حضرتك لو موافق علي البيان ده ممكن تبعث بموافقتك علي الإيميل ana_ikhwan2007@yahoo.com بس ياريت بسرعة عشان يتنشر في مكان .
أو ترد علي مدونتي .
وياريت تنشره لكل مدوني الإخوان اللي تعرفهم .

Anonymous said...

ابراهيم
كتاباتك بتعجبنى لكن.....
ياريت تجتهد فى ان تكتب بالفصحى

امام الجيل said...

عندك حق فعلا احنا دلوقتى فى مفترق طرق ولازم نستغل عجز النظام وخوره بالطرق الدائم وعدم الخنوع واللى يقرا ويشوف تاريخ الامم والدول يلاقى ان النظام بيودع بس نصبر بس الفترة دى ونعد نفسنا ان نكون على قدر المهام المقبلة
انما النصر صبر ساعة

3omaroo said...

و كلنا معاك يا ابراهيم

كلنا و الله بنحبها و بنعشق ترابها

و هنفضل نحارب الظلم من اجلها

و هنفضل نُعتقل و نتحبس فى السجون علشانها

احنا ملناش غيرها




و على فكرة يا ابراهيم انا بحب اوى كتاباتك
انتا يمكن ماتعرفنيش علشان ماشوفتينيش غير فى المؤتمر
بس انا و الله بحبك فى الله و نفسي اقابلك تانى

انا عمر علاء صاحب بلال
سلام يا صاحبي

وضـّاح said...

السلام عليكم

أعادك الله إلى مصر سالما غانما

ودام محبي مصر لها

ودامت مصر لمحبيها

صاحب البوابــة said...

كلما رأيت دمعة في عيون

من يعشقون تراب هذا البلد

كلما رأيت مغيباً خلف أسوار تلك البلد

كلما شاهدت عقلا يعتقل وقلما يقصف

آمنت وتأكدت

اننا فقط في مصر

AbdElRaHmaN Ayyash said...

وقع بيان المدونين للتضامن مع عبدالمنعم محمود
شارك بتوقيعك
أنشر البيان في كل مدونة تعرفها
ساهم في حرية المدونين .. وحرية منعم
http://free4monem.blogspot.com/

عمرو طموح said...

إبراهيم باشا من بني الهضيبي

بداية هو التعليق - لو ينفع يتقال عليه تعليق أساسا - مش علي اللي انت كاتبه...

بس في حاجة أنا كاتبها بخصوص حاجة انت كنت قلتهالي قبل كده.. أظن إنك لو قريتها و علقت ممكن تثري النقاش بشكر كبير، و في نفس الوقت تعرف وجهة نظري في اللي انت كنت قلتهولي...

"الزنا مش ذنب حضاري؟!"

ادخل عندي و اقرا عن الحضارات و القيم و سنن الصعود و الهبوط...

يللا مستنيك يا صاحبي

agzakhangy said...

حب الأوطان من الإيمان ..
ربنا يردك بالسلامة يا عمو إبراهيم ..
وربنا يثبتنا جميعا ويفك أسر إخواننا كلهم يا رب
آآآمين

واحد من الإخوان said...

هو الواحد أحيانا ما بيحسش بحبة لحد غير لما يسيبة شوية
وعاوزين نفرق فعلا بين مص وبين اللي ماسكين مصر
مصر هي اللي كنت بتتكلم عنها إنت ومجدي
وكلنا بنحبها
اما اللي ماسكين مصر!!!!!!!!!1

يلا ما فيش داعي نقول كلام يضايقهم

محمد حمزة