Saturday, April 28, 2007

يا منعم أبوك بخير

"علي فكرة اطمئن علي والد منعم
هوا بخير
كنت عنده يوم الاربعاء اللي فات ده
وكان مبسووط جدا جدا
ربنا يعافيه ويفك اسر ابنه"
دا فقرة أخدتها من إيميل وصلني من عبد الرحمن، صديق عبد المنعم
رأيت أن أنشرها لأطمئن أصدقاء منعم
وكل من كان يدعو له ولوالده
يا منعم أبوك بخير الحمد لله
ربنا يبارك له ويديله الصحة
إحنا اللي مش بخير، الحمد لله
مش بخير طول ماحنا ساكتين على الظلم
مش بخير طول ما الأحرار اللي فينا بيناموا في السجون، والحرامية في القصور
مش بخير طول ماحنا خايفين نقول للظالم يا ظالم، واللي بيقول بيبقى لوحده
إحنا مش بخير طول ما منعم في السجن علشان بيقول رأيه
مصر مش بخير طول ما الشاطر في السجن علشان قال لأ للتوريث، ولأ للفساد
مش بخير طول ما حسن مالك فلوسه مجمدة علشان مش بينظم بيها مؤتمرات للحزب الوطني، ومش بيخالف ضميره ويعلق بفط تأييد للرئيس، والوزير، والمحافظ، والنائب، وأمين الحزب
إحنا مش بخير طول ما العلماء اللي زي الدكتور خالد عودة في السجن
أكيد مش بخير طول ما اللي قتل الفنانين في قصر الثقافة لسة قاعد على كرسيه
ومش بخير طول ما اللي غرق المصريين في العبارة بياكل ويشرب ويتفسح في لندن
ومش بخير طول ما أهلنا بياكلوا لحوم مسممة، وبيشربوا لبن فاسد، وولادهم في المدارس بيأكلوهم أكل فاسد، وبعدين بينقللولهم دم فاسد
منعم يا أخويا، أبوك بخير
ما تقلقش عليه
اقلق علينا احنا
احنا اللي قصرنا
وعلى رأي مجدي: منعم يا صاحبي...سلام

No comments: