Monday, April 30, 2007

خلاص

أنا لغيت كل تعليقاتي اللي كانت على تدوينة النقد الذاتي عند مجدي لعدة أسباب، هي باختصار شديد: 1- أكيد أنا غلطان لسببين (وكان الطبيعي إني أبدأ بأخطائي) أولهم إني عصبي جدا وحاد وده غالبا بيظهر في كلامي، بس دي وراثة والله، وبحاول أغير الموضوع ىده، المهم إني خايف الموضوع يقلب شخصي معايا علشان الموضوع أخد بعد شخصي فب أغلب التعليقات اللي بترد (مفيش ولا تعليق بيناقش) ما أقوله، والناس بوضوح شديد لا تفصل بين الشخص والفكرة، وبالتالي مفيش ولا تعليق ناقش ما أقوله، وأنا كل ما آجي أكتب تعليق أكون متضايق من أسلوب الكلام وأقول هاكتب أنصح إن الناس تتكلم بالراحة، وأرجع وأقول مش عايز أشخصن الموضوع‘ إنما كدة كتير، وأنا بطبعي (للأسف) عصبي، فلو اتكلمت أكتر من كدة هايبقى مراء وقضية شخصية 2- إني طرحت أفكار غير كاملة، يعني مقتطفات كدة،أي حد أصلا ميعرفنيش ممكن مايبقاش فاهم أنا بتكلم عن إيه، في أنا كلالكلام ده مكتوب عندي في مقالات أصلا أعدها للنشر، لما انشرها هابقى أناقش، إن شاء الله، ولكن في إطار مختلف لإني مش بعرف أتناقش كدة 3- من زمااااااااان كان جدي عليه رحمة الله، ومن بعده نقيب أسرتي، والمشؤول الاداري نصحوني بعدم الدخول في مثل هذه النقاشات اللي فيها عدد كبير، خاصة إذا كان الموضوع نفسه ليس عليه إجماع، لأن الناس مش هتسمع ومش هتحاول تفهم، وللأسف ده اللي حصل، الناس خدت ألفاظ من الكلام وعملت منها قصة وحكاية ولم ينقذ ولا واحد للب ما أقول 4- في أخ عزيز جدا عليا اعتبر أن مناقشه هذه الأمور مثل الحديث عن البعوض الذي يفسد الوضوء، وأنا اختلف تماما، لأن قضايا الإصلاح الفكري هي الأساس للحديث عن أي إصلاح آخر على مستوى الفرد، وعلى مستوى الأمة ولكن لو الناس هتتعامل مع القضية كما يتعاملون، هتبقى سبيل لإهدار الطاقات لا تنميتها وترشيدها وتوجيهها يبقى أصلا مفيش فايدة من الكلام، ويبقى كلام أخي الحبيب أحمد عبد الحافظ في محله أنا فعلا مش عايز أتكلم في الموضوع ده مع حد، وفعلا حزين إن ده إسلوبنا في النقاش، ودا تقبلنا للخلاف في الرأي، طبعا أنا مش بعمم، بس للأسف إن دا موجود كتيييير أوي سبحانك اللهم وبحمدك، أشهد ألا إله إلا أنت، أستغفرك وأتوب إليك

11 comments:

يلا مش مهم said...

عارف يا ابراهيم
ان انا كنت هاتصل بيك واطلب منك تقابلني علي الماسينجر علشان اقولك انك تهدي شوية وانا عارف جدا انك غيور علي الاخوان وبتحبهم جدا وعارف قد ايه انت تعبت في نشر قضية الشاطر واخوانه وفاكرك وانت عمال تجري يمين وشمال علشان مؤتمر القاهرة الفائت
وعارف قد ايه عصبيتك وانفعالاتك اللي مش وراها الا قلب ابيض جدا ونفس شفافة مش متلونة
ومن الواضح انك تأثرت جدا بما حدث لاني اخر ما كنت افكر فيه هو انك تقوم بحذف تعليقاتك
بس عارف يا صاحبي انا نفسي بعد ما شوفت حجم التعليقات وحدتها راجعت نفسي اكثر من مرة ويعلم الله كم انا واقع في حيرة بخصوص الاستمرار او عدم الاستمرار في تلك السلسلة
وذلك لاني لاحظت ان هناك عدم نضج في تناول الافكار وهناك كبت لدي البعض دفعهم الي الخروج من مسار التقد والبناء الي مسار التراشق والاختلاف والخناق
وادعيلي ربنا يوفقني واحسم امري ويهدينا جميعا ايل سواء السبيل
وربنا يرجعك بالسلامة لمصر وللناس اللي بيحبوك

إبراهيم الهضيبي said...

السلام عليكم يا حاج مجدي
أولا جزاك اللخ كل خير‘ على النقد الذاتي أولا‘ وعلى التعليق ده ثانيا
بس أرجوكم أنا مش عايز حد يدافع عني
الحمد لله، عمري ما كنت مستني حد من الإخوان يقوللي برافو عليك، وعمري ما كنت بشتغل علشان خاطر عيونهم، والكلام اللي قلته في التعليقات عندك ماكنتش بستجدي بيه رضاهم
أنا كنت بتحرك في المؤتمر علشان دي دعوتي، ودي فكرتي، والأجر عند ربنا
ولما كنت بتحرك علشان المهندس خيرت، اللي بيدفع ثمن غباء مجموعة من الناس حتى الان رافضين النقد الذاتي، كنت بتحرك بدافع الوفاء لأخ كريم كان حريص على إصلاح العقل الإخواني..وكان عند صبر اكتر مني بكتير، ربنا يفك أسره
كنت بتحرك علشان الوفاء، وعلشان وجود المهندس خيرت برة دفعة للإصلاح، وعلشان الدفاع عن الحق والعدل واجب إنساني وإسلامي
ومش مستني من حد يقولي شكرا، الحمد لله لا نريد منكم جزاءا ولا شكورا، والحمد لله مش هتأثر لما الناس تتهمني في عقلي وإخلاصي وأهدافي وفي نيتي
بس اللي فعلا ضايقني، إن أخويا وحبيبي اللي بيقول إن المناقشات دي بتعطل هو أكتر واحد عارف إنها عمرها ما عطلتني، وهو كان معايا في كتييير أوي من اللي كنت بعمله، وهو عارف إن الكلام ده عمره مأخرني عن إني ابعت الرسائل اللي بيقول عليها
وهو اللي لما كنت بتكلم معاه عن مداخلتي في العاشرة مساءا وبقوله خايف أكون كنت حاد شوية قاللي لأ، ولازم نكون واضحين في رفضنا للخطأ، ونقد اللي حصل هناك (ووقتها برضه كنا في نفس الظروف بتاعة دلوقتي)، أنا الحمد لله مش متضايق إني قلت ما أراه صوابا
ومش متضايق إن ناس لو الإمام البنا شافهم مش هيقول عليهم إخوان بيقولوا إن أنا معرفش حاجة عن فكر الجماعة
ومش متضايق إن ناس مقروش للشهيد قطب متضايقين من نقدي لأفكاره، لأن أنا أمانتي العلمية خلتني مكونش رأي غير بعد لما قرأت معظم ما كتبه، بما في ذلك الظلال والمعالم كاملين، بالإضافة لحواراتي مع جدي وتعليقاته على كتاب دعاة لا قضاة
أنا بس متضايق إن أقل حد إتكلمت معاه كان عنده تقبل للخلاف هما الشباب اللي أثق تماما في إخلاصهم، علشان كدة متضايق
ويلا الحمد لله

يلا مش مهم said...

صاحبي
من الواضح ان المعاناة اللي انت بتمر بيها مش قليلة
وانا متاكد ان المعاناة دية مش لانك بتعمل من اجل ارضاء الناس ووجدت غير ذلك منهم
اللي انا متاكد منه صدمتك في ردود الاخرين واهاناتهم لك وسخريتهم من طرحكوالاكثر ايلاما لك هو ان التجربة التي بدات بهذه التدوينة اصبحت مهددة بالفشل او انها ستنحرف عن اهدافها
عارف يا صاحبي
ان انا دلوقتي باخد اراء الناس القريبين مني وبرتاح لرايهم ومختارهم من مدارس وثقافات مختلفة لاخذ رايهم في الاستمرار او التوقف عن هذه السلسلة
وان التصويت الان 4 مع التوقف و2 مع الاستمرار
ومبرر المؤيدين للتوقف هو عامل الوقت والظروف التي نمر بها الان
من ضربات امنية موجعة وحالة الارتباك الظاهرة في حركة كل الفصائل السياسية في مصر ومنها الاخوان
بجد يا صاحبي انا محتار جدا وهاستني لغاية النهاردة بالليل وهاحسم امري
اما الاستمرار او التوقف
ادعيلي محتاج لدعاك قوي
ومتزعلش نفسك من اللي حصل
احنا كنا عارفين كدة من الاول لما كنا بنتناقش في تلك السلسلة
ويللا مش مهم

واحد من الإخوان said...
This comment has been removed by the author.
إبراهيم الهضيبي said...

بصراحة يا مجدي رأيي تكمل لو تقدر، وأكيد مش هلومك لو مقدرتش، لإن أنا مقدرتش، والموضوع أصبح شخصيا، وكنت هبقى بدافع عن نفسي لو رديت

الكواكبي said...

ازيك يا هيما؛ ايه يا عم التهريج ده . . رغم اعتراضي على سخونيتك الزائدة الا ان مش الحل انك تحذف تعليقاتك لأن ده اداني رسالة سلبية , انت ازاي داخل تؤيد التمرد ورمي الحجار - بحسب تسمية مجدي - بغض النظر عما سيلقاه راموها من عنت ومتاعب وبعدين تنسحب بشكل سلبي كده؟
انا مش موافق على توقيت تدوينة مجدي وبرضه مش موافق على انساحبك ده وتقدر تقول اني غضبان ومحتاج نتكلم كتيييييييير جداً في الحركة اللي ما انتظرتش انها تطلع منك . . دي نقطة
النقطة التانية ايه حكاية الأستاذ سيد قطب؟! ومين قال لك ان الجيل ده يعرف عنه اي شيء غير انه تم اعدامه؟ وليه بتفتح حاجة مش موجودة حالياً غير في عقول الأخوة الذين انضووا تحت تنظيم 1965؟
انا قريت للأستاذ سيد ومش قريت وبس ده انا كنت ساعات باخطب الجمعة وانا محضر من كتاب المعالم وكنت باحس بقلبي بينبض بشدة وانا بانط بين السطور آخد سطر واسيب تلاتة علشان مش داخلين دماغي وانا اعلم ان خطابه اقرب للتكفير منه لوسطية الإخوان . . ولكن يبقى سيد قطب في نهاية الأمر مفكر صاحب مشروع لم يكتمل شئنا ام ابينا! فكما لا ننكر على ماركس وسارتر ولودفيج يجب الا ننكر على قطب ونحجر على تفكيره المتماهي تماماً مع ظلاميات التكفير
ويبقى سيد قطب رمز لرفض بيع العقل ورمز لرفض كسر الإرادة . . هذه هي صورة سيد قطب عند الشباب . . المسلم الذي رفض ان يوقع على تأييد الظالم وهو نموذج كما تعلم قليييييييييل جداً في هذه الأيام
انا اعلم بصدق طويتك وبحبك للدعوة وكرهك للأغبياء ولكن يا ابو خليل ليس كل ما يدرك يقاااال
سلام يا حبيبي وترجع بالسلامة

إبراهيم الهضيبي said...

يا كواكبي يا حبيبي
أولا هحبطك معلش: مش هتكلم في الموضوع دا لما أرجع مصر، مش عايز غم خلاص
ثانيا: آسف إني أحبطتك علشان سحبت توقيعي، بس أنا فعلا أي حاجة كنت هكتبها بعد كدة كانت هتبقى دفاعا عن نفسي، وكان هيبقى فيها المرارة اللي في كتابتي دلقوتي، وأنا استخرت قبل ما أحذف تعليقاتي، وقررت، وإن شاء الله ربنا ميحطنيش في مواقف تاني أتكلم فيها مع عقول خشبية
ثالثا: مفيش حاجة إسمها مش وقته النقد يا أستاذنا، غياب النقد دا هو اللي مودينا في داهية، وقمة النقد في السيرة جاءت بعد أحد، سورةآل عمران رائعة في هذا السياق (قل هو من عند أنفسكم)، فكرة تأجيل النقد، زي ما حد أنا وإنتا بنحبه كان بيقوللي قريب، تستخدمها الأنظمة القمعية بعد الهزات الكبيرة لتأكيد بقاءها عن طريق تأجيل المراجعات، على طريقة لا صوت يعلو فوق صوت المعركة بتاعت ناصر، خاصة إن ما قدم من نقد هو بناء، كله يهدف إلى دفع الجماعة للأمام وليس كسر شوكتها
رابعا: أنا أحب الأستاذ سيد قطب أكثر مما تتخيل، فعلا، وتأثرت كثيرا بسيرته، اللي زي ما إنت بتقول نموذج في مواجهة الاستبداد، وتأثرت كذلك بكتاباته زي التصوير الفني، ومشاهد القيامة، وغيرها، بس ده لا يمنعني من إني أختلف مع أفكاره بشكل كبير، ومن دون أن أرى ذلك انتقاصا منه كمجاهد ضحى كثيرا في سبيل فكرته
وأنا برضه مختلف مع ما تقوله حول أنه ليس له تأثير، أغلب الناس بتقرأ الظلال، ولبراعة اسلوبه الأدبي يؤثر فيهم أكثر من غيره
والله أنا فاكر كويس جدي عليه رحمة الله لما سألته على المعالم وقلتله إني هأقرأ الظلال قاللي لأ لأن هناك أخطاء خطيرة جدا ولن تتنبه لها بسهولة لأنك لم تقرأ كثيرا، وكان بدأ معايا في شرح (دعاة لا قضاة) وكان واضح جدا في موضوع إن هذا الكتاب رد على كتابات سيد قطب، ورفض لما فيها من أفكار، وبالتالي فإنما قاله بعض الشباب من أن هذه قضية محسومة وأن أفكار قطب تمثلنا هو كلام فارغ، وأنا لا أحجر على الشهيد قطب ولا أملك ذلك، بل أنا أقدره كمفكر لم يكتمل مشروعه الفكري بسبب القمع، وهذا المشروع الفكري بلا شك مشروعه الخاص، وليس نتاجا لمدرسة الإصلاح اللي أرساها محمد عبده، ومن بعده رشيد رضا والإمام البنا، وطبعا حبيبك الكواكبي
رابعا: أختلف معك في فكرة أن ليس كل ما يعرف يقال، هذا قد يكون صحيحا في عالم السياسة، ولكنه بالتأكيد خاطئ في عالم الأفكار
هي الأفكار مينفعش تختبئ، أو تتعطل، ودا خطير جدا، وهذا هو ما ينتج التشوهات الفكرية التي نعاني منها، ما أسميه (عسكرة ساحات الفكر) كنت أحصره على القمع الأمني، ولكن للأسف اكتشفت أن هناك نوعا آخر من القمع الفكري، اللي كله اتهامات وليس به إي مناقشة علمية
يا ريت تبقى دي آخر حاجة أكتبها في هذا الموضوع، والله إني أحبك في الله، ولما أرجع مصر إن شاء الله هكلمك علشان أشوفك مش علشان نتكلم في هذا الأمر

Anonymous said...
This comment has been removed by a blog administrator.
إبراهيم الهضيبي said...

للأسف اضطريت أحدذ تعليق لأن اللي كاتبه أسلوبه وأخلاقه متسمحش إني أحط تعليقه عندي، ولو عنده اعتراض على هذا الأمر ياريت يراسلني على إيميلي
houdaiby@yahoo.com

الكواكبي said...

خلاص . . مستنيك نتكلم في موضوع تاني
بس بلاش موضوع المرارة ده؛ ما فيش شيء يستاهل . . الموضوع ببساطة انك دخلت قلت رأيك في مكان غير ملائم
تقدر تقول انك دخلت تدي محاضرة عن غياب النخب الجديدة في حلقة سمك :)
وبعدين يا عم هيما كلام مالك بني نبي رحمة الله عليه مش غاية التطور الفكري الإسلامي
وبعدين موضوع غزوة أحد مع احترامي ده مش نقد!! ده توجيه وتصحيح الهي والفرق كبير والموقف ده بالذات هو اللي هايرد
الله سبحانه وتعالى انزل التصحيح والارشاد على رسوله (القيادة) التي نقلته للجنود في وقت (أزمة) (لإصلاح) مفاهيم وسلوكيات مغلوطة
اي انه اثناء الأزمة تم تغيير من اعلى لأسفل
وحين تكلمت القاعدة المسلمة في وقت الأزمة سمي الأمر ارجافاً
وده اللي انا نفسي اوصل له احنا كان ممكن ننتقد من 6 شهور فاتت قبل ما الكارثة تقع بس للأسف ما عملناش كده!! ورأيي نستنى شوية صغيرين لحد ما الغمامة تنجلي إما بتمام البلوى أو بزوالها
بص يا عم . . بغض النظر عن الدوشة دي كلها انت بجد واحشني مووت

واحد من الإخوان said...

انا قريت موضوع الشتيمة ده عند مجدي
بصراحة هو اللي شتم ده
حاجة من إتنين
إما واحد ما لوش علاقة بالإخوان خالص وبيوقع الناس في بعض
أو واحد
مش عارف اقول واحد إيه
اصل الرد مش هيكون مناسب

يلا
لسة قدامنا كتيير على ما نتعلم الحوار

انا ما كنتش عاوز اعلق عندك عشان الموضوع ده طول اوي
لكن
إتضايقت اوي من الناس اللي بتشتم دي

محمد حمزة