Tuesday, June 19, 2007

نقاط سريعة

السلام عليكم أنا فعلا مش عارف ليه مش قادر أكتب كتير، بس في مجموعة نقط مهمة قلت أقولها أولا: في أخ كريم وأستاذ فاضل قاللي إن لغتي أصبحت غاضبة جدا في الفترة اللي فاتت، وأنا دافعت عن نفسي وقلت إن ده طبيعي، بسبب حاجات كتير منها اللي بيحصل هنا في مصر بس الحقيقة بعد لما هديت، ورجعت قريت اللي كتن كاتبه، وخاصة الدعاء، لقيت إن لغتي فعلا كانت قاسية، وده بيعبر عني كإنسان كنت في حالة غضب حقيقي وقت لما كتبت هذا الكلام، بس الكلام ده مكنش صح، وأنا فعلا آسف على لغتي، والرجوع للحق فضيلة الحقيقة إن الظلم وصلني لدرجة غضب أخرجتني عن خط التسامح اللي أنا بدعو ليه أصلا، وطبعا أنا بكرر أسفي على ده ويا رب ما يتكررش تاني، وأفضل قادر أمسك نفسي ثانيا: كنت بفكر في حالة مصر، ولقيت إن المخرج في ظهور مؤمن آل فرعون، أو الحقيقة في أن نتحول جميعا لنصبح هذا الرجل، الذي خرج يدافع عن حق الجميع في أن يعرض رأيه، وعن حق الناس في أن يختاروا ما يرونه صحيحا أو أصلح الرجل خرج على قمه مدافعا عن موسى الذي تعرض للتهديد بالقتل من فرعون فقال (,إن يك كاذبا فعليه كذبه، وإن يك صادقا يصبكم بعض الذي يعدكم)، وسأتناول هذا الموضوع بالتفصيل لاحقا إن شاء الله ثالثا: ما يحدث الان فس فلسطين مرعب، ويؤخر القضية الفلسطينية بأكملها، وأنا مع حبي الشديد لحماس فإنني غاضب مما يحدث منهم الان، وأعتب عليهم الأفعال والتصريحات على حد سواء، فكلها كانت انفعالية غاب عنها العقل، وأنا أعلم كم الضغوط الذي تعرضوا له، ولكن كان عليهم الاحتمال والبعد عن محاولة استرداد الحق الشخصي لأن مصلحة الأمة أهم، وقصة الرسول مع ابن سلول حين قال (ليخرجن الأعز منها الأذل)، وقصة صلح الحديبية وما تعرض المسلمون له من استفزاز قبله وأثناءه تدلل على ما أقول، وقد أتناول ذلك بالتفصيل لاحقا أيضا دي تلت نقط كنت عايز أقولها، وفي انتظار تعليقاتكو

17 comments:

alnagar said...

please go to
http://anam3ahom.blogspot.com/
من الممكن أن تغير وجهة نظرك في موضوع حماس

د.وليد said...

وحشتنا يا إبراهيم وافتقدنا كتاباتك الفترة اللى فاتت ربنا يكرمك ويوفقك...
أولا أنا كنت عاوز أقولك إ ن لغتك كان فيها حالة واضحة من الغضب بس ده الواحد كان مقدره لأن الحالة العامة فى مصر مش مريحة حد وتلاقى الناس عمالة تغلى من جواهاومثلا بقى حاجة طبيعيةلما تركب تاكسى وتكلم مع السواق تلاقيه عمال يشتم فى الحكومة وسحب الرخص والزحمة والخريجين اللى مش لاقية شغل وكادر المعلمين اللى بقاله كام سنة بيقولوا عليه وإلغاء التعيين وكتير من ده
البلد فيها كم غضب مكتوم ربنا يستر
والحقيقة ماحدش يقدر يتوقع إيه اللى ممكن يحصل مستقبلاوشكل التغيير حيكون إزاى
أما بالنسبة لموضوع حماس فواضح إن فى قوى كثيرة تريد إفشال التجربة سواء من الداخل أو دول عربية أو قوى دولية دا غير الأمريكان والإسرائلين
لذلك أنا مشفق عليهم كثيرا فالوضع شديد الصعوبةو فيه مواجهات حتمية
ولا يمكن بأى حال من الأحوال أن نغفل ونتغاضى عن العملاء فى الداخل وخطرهم الشديد

كبر دماغك said...

مممممم

و الله يا اخ إبراهيم حلوة أخ دى؟:)


بالنسبه للغتك الحاده أيوه كده إظهر و بان إنتوا الأخوان كده تدخلوا هادييين و راسييين و بعد كده هطلعوا عنينا ... لألألألألألألألأ بهرج يا أخ و الله:)

بص

أولا معظم المدونين بيكتبوا بطريقه حاده و أحيانا خارجه ده نتيجة ان الناس أصلا مبقوقه و بتدون عشان تفش غيلها و غضبها ( راجع معظم المدونين من جميع الأتجاهات)

ده غير بقه كمان لما تكون فى قلب الحدث و عاييش و دايق القرف مع المظلوميين زى أبناء المعتقليين كده... بالنسبه بقه لحماس
really no comment


يعنى انا أخدت شتيمه أأأأأأأأأأأد كده إنى كنت بدافع عن حماس و حكومة حماس زمان و يو م ما كسبوا فى الأنتخابات وزعت شربات!!!!!

لكن دلوقتى إيه يفرق حماس عن واحد حزب وطنى حقير يقبل إن ولاد ديارته يموتوا عشان كرسى فى المجلس؟


إيه القرف ده ...أنا حماس و فتح حسسسونى بالقرف بمدى أهمية الكرسىو نظريتهم إن يتحرق الشعب أكتر ما هو محروق


ما يحدث فى مصر مهزله و ما يحدث فى فلسطين كارثه

p.s: إيه الأدب الى إنت فيه ده ما تكتب بالطريقه الى تريحك بلوجك يا عم و إنت حر فيه

يلا سلام

إبراهيم الهضيبي said...

السلام عليكم
أنا حاسس أن موقفي من حماس محتاج توضيح شوية
أنا لا أساوي بينهم وبين فتح، وأنا عارف ما يعانونه من ضغط شديد، ومشفق عليهم، وعارف إن الموضوع مش كرسي، وعلى مدار العام الفائت اتكلمت وسمعت لناس كتير ففاهم الوضع هناك والضغط اللي هما فيه
ولكن مينفعش الضغط يخليهم يعملوا كدة
في لحظات مينفعش الواحد فيها يغلط، أو حتى ياخد حقه
موقف الرسول من ابن سلول هو إنه تركه (حتى لا يقال محمد يقتل أصحابه)، ده بالرغم من بجاحة وقذارة ابن سلول، ودا رأس النفاق، ولن يتفوق عليه منافق عصري
بس الرسول هنا كان بينظر إلى النتائج وإلى المقاصد
وهو ما لم تفعله حماس
نفس الموقف في صلح الحديبية، مع الاستفزازات الخطيرة التي تعرض لها المسلمون قبل توقيع الصلح وبعده، استفزازات جعلت عمر ابن الخطاب يخرج عن شعوره بعد ان جاء إبن سهيلبن عمروا مسلما، وقد هرب من التعذيب، فرده الرسول إلى أبيه، رغم أنه قال (أتتركني يفتنوني في ديني)، ولكن مصلحة الأمة هنا كانت أعلى من مصلحة الفرد
هناك مواقف كثيرة، وقد أتناول الموضوع بتفصيل أكثر بعد ذلك، ولكني أردت التوضيح لهذه النقطة

hosini said...

السلام عليكم ورحمة الله وبركاتة
اخى فى الله ابراهيم
للعلم انا كنت كتبت وقلت انك اتأخرت فى التدويين كتير
ولكن لى عتاب
رأيك فى مايحدث فى غزة غير منطقى شوية ان حماس سكتت على الاهانات والشتائم كثيرا تبركا وتمثلا برسول الله صلى الله عليه وسلم ولكن عندما يصل الامر بأن يدخل المسلحون المساجد فى غزة ويقتون كل من فيها فهذا اخرهم عندما دخلت حماس المخابرات الفلسطينية اقصد الصهيونية واكتشفت شبكات الانترنت التجسسية على الفلسطينيين فماذا كانت حماس لها ان تسكت ان حماس دافعت عن الاسلام بدفاعها على غزة وارجو منك ان ترى وتشاهد قناة الاقصى على تردد 10911 عمودى على النايل سات
وتتصفح المركز الفلسطينى للاعلام
وان تبنى وجهة نظرك من السماع الى الجانبين لاننا للاسف الدش والقنوات الفضائية كلها ضد حماس والذى ليس ضدها يحاول ان يكون فى الوسط فلا بد ان نبنى راينا بشكل جيد

أخت مسلمة said...

بالنسبة للنقطة الاولي :

فعلا الدعاء كانت نبرته حادة جدا جدا

بس احنا لو وصلنا لده معذورين والله

الظلم كتير اوي

بس اكيد لابد من ضبط النفس
--------

النقطة التانية

معك فيها كل الحق

و في انتظار البوست الكامل عنها

--------

اما موضوع حماس

" فقاتلوا التي تبغي حتي تفئ الي امر الله"

وده اللي حماس بتعمله

من حقها تدافع عن نفسها

وكمان الاعلام علي فكرة هو اللي بيشوش افكارنا

وبيظهر حماس في غير صورتها

وان كان فيه بعض التجاوزات فلها كل العذر فيها

ما حدش بيعاني زي حماس دلوقتي

ربنا يثبتهم و يبارك فيهم و ينتقم من الظالم

-------

في انتظار المزيد

جزاكم الله خيرا

jowayreya said...

salamu 3alaykom,
1)ana mesh did el masha3er aw en el insan ya3'dab l mawfif mo3ayan, w bsara7a elli e7na fih dah ye5alli ay 7ad ya3'dub,
el naby (sAs) kal: la ta3'dab,
3lashan ay karar hayeb2a natig 3an el 3'adab hayeb2a karar 2a7mak, zay elli 7asal fi el 2azhar (iam talkin generally, i dont mean u)

2)el 7al fe3lan mota3alik bina kolina, 3lashan el nas bto3od 7atta 2edha 3ala 5adaha w te2ool emta ba2a hayigi hani sala7 el din

3)belnesma l mawdoo3 7amas f ana shayfa en mafeesh loom 3ala 7amas 3lashan kano byra3o el zorof elli homa feeha kteer bas now homa weslo l mar7alit el defa3 3an el nafs,
see this issue on that blog:
shabmasrey.blogspot.com
salam

Anonymous said...

انته شكلك اتماديت فى فكرة النقد الذاتى بتاعت مجدى سعد بتاع مدونة يلا مش مهم بسى النقد يااستاذ مش نقد وبس المفروض حضرتك تنظر للموضوع من كافة الجوانب والاتحكم من جانب واحد والا تتمادى فى الحكم الخاطئ لان هذا يجع عدم وجود فرق بينك وبين من يصدرون الاحكام بدون وجه حق
ارجو الا تفرح وتتمادى فى موضوع النقد الذاتى حتى لو كان رايك خطاء
ارجو ان تبنى رايك بطريقة صحيحة
انت خسرت كثييييييييييرا بسبب هذه التدوينة
لان الكل يعلم ان الذى فعلوة اخواننا فى حماس كان يجب ان يحدث وللعلم اخواننا فى حماس اعلنوا اليوم عن وثائق استخباراتية تبين ان المخابرات(الفلسطينية)
وليست الاسرائيلية قامت بالتجسس على المشروع النووى الباكستانى لصالح اسرائيل
لصالح الكيان الصهيونى
وسيادتك تطلب العفو والتمهل وعدم القتال معهم
مع من مع من يصبح اداة فى يد محتلة انه العار
ومن العار ان نحمل حماس مسؤلية ماجرى
ارجو ان تراجع نفسك كثيييرا
سامحك الله على هذا المقال فى حق من يدافعون عن شرفنا فى ارض الرباط فلسطين
واحد كان بيحبك

إبراهيم الهضيبي said...

مع احترامي لك، أنا مصر على رأيي، وللأسف الأيام القادية ستثيت أن ما فعلته حماس سيكلفنا جميعا الكثير، وسيؤخر القضية أشواطا كثيرة،
وأنا لا أهتم أن أخسر أحد بسبب المدونة، لأن ما يعنيني هو أن أقول ما أراه حقا
وأنا أعرف عن حال حماس وعما يجري هناك أكثر كثيرا مما تظن، وأكثر مما يعرف معظم من تحدث، وأصر على رأيي، يعلم الله أن ذلك ليس تكبرا
ولكن اسلوب التعالم خاطئ، ثم خاطئ، ثم خاطئ

إبراهيم الهضيبي said...

ويا عم أنا مش مستني حبك، حبني ولا متحبنيش مش فارقة صدقني، المهم بس تتعلم تفكر خارج إطار الفعل ورد الفعل، وشف اللي عملته حماس ده هيعمل إيه فينا

عمرو طموح said...

عمو هضيبي...

بص.. تعليق سريع كده... علي موضوع حماس...

عاوزك تقارن بس، بين حاجتين... بين كلامك عن نفسك فوق، و كلامك عن حماس تحت... أنا بس عاوزك تفكر فيها لحظةواحدة و أكيد هتفهم أنا أقصد ايه...

يعني احنا هنا في مصر، بنحس بالظلم، و بنقول إنه بيعصبنا و بيمثل ضغط علينا، وممكن يؤثر كمان علي خطابنا يخليه غاضب، أو ساخط، أو كما تقول رسالة دكتوراه من معرفش مين، إنه بيتناسب مع ظهور حركات الرفض الاجتماعي، و خاصة ذات المرجعية الإسلامية، مش هي دي القصة دلوقتي... المهم.. قارن بين الظلم اللي بنتعرضله، و الظل اللي في فلسطين...

ضياع أرض، و عرض، و إهدار دم، و قتل تشريد، و خيانات علنية صريحة... أظننا لن نختلف علي فداحة ما يتعرضون له هناك.. و رغم كل ذلك... كم غير مسبوق من ضبط النفس... أنا مندهش له... ثم جاءت لحظة فاصلة... أخذوا فيها قرارا حاسما، بعدم السكوت... ما أقوله هو أنه لم يكن قرار من فاض به.. و لكنه كان قرارا سياسيا في المقام الأول نابع عن رؤية بالتأكيد...

يعني... الكلام عن القرار و نواتجه يطول، و تكلفة الفرصة البديلة يجب أن تؤخذ في الاعتبار...

ختاما، أتفهم وجهة نظرك، و لكني أجدني أختلف مع مساحات منها، مش دلوقتي بأه عشان ده ممكن يطول...

ادعوا لهم كثيرا بالثبات و الرشاد

و سلام يا صاحبي

إبراهيم الهضيبي said...

عمرو حبيبي
أولا واحشني
ثانيا بص يا عم الحاج
المقارنة في غير محلها لعدة أسباب
أولا أنا لم وصلت لحالة من الغضب عبرت عن ده بالكلام، مش مسكت عصاية ونزلت ضربت عسكري، ولا خدت مطوة وطعنت ظابط أمن دولة، لأن مش دي طريقة رفع الظلم أبدا
ثانيا أنا عبرت في مدونتي الشخصية، ولم أعبر عن ذلك في تصريح صحفي كفرد في الإخوان، أو في موقع أو شبه رسمي رسمي للجماعة، وبالتالي فالمجال أوسع
ثالثا أن ما فعلته أنا خطأ، وأنا قلت ذلك، الخطأ والتصرف بعاطفية أمور تغفر لشخص، ولكنها أبدا غير مقبولة من تنظيم
الجميع يتكلم عن هذا الأمر وينظر إلى أسبابه، وأنا أنظر إلى نتائجه
كلنا نعرف على الأقل صورة عامة عما يجري في الأراضي المحتلة
ولكن قمة المسؤولية هي أن تضع في اعتبارك النتائج، نتائج ما تقوم به خاصة إذا تعلق الأمر بمصير أمة وحياة شعب، وتتحمل فس سبيل ذلك الكثير الكثير
الرسول القدوة تحمل في سبيل ذلك مقولة قذرة قالها المنافق بي سلول حين قال (والله لئن رجعنا إلى المدينة ليخرجن الأغز منها الأذل)، ولم يعاقبه حتى على هذا القول حتى لا يقال محمدا يقتل أصحابه
وفتح ليست ابن سلول، ولا حتى أسوأ من فيها
وحماس ليست معصومة، ولا تملك الحق المطلق، ولا حتى أفضل من فيها
وبالتالي معالجة الأمور على هذا النحو فيها قدر كبير من قصور الرؤية، ونسيان الهدف الرئيسي والانجرار لمعارك جانبية مدمرة، وتلك هي دائما الافة الكبرى للحركات الإسلامية المعاصرة، التي كررت هذا الخطأ، أو قل وقعت في هذا الفخ غير مرة، في مصر والجزائر والسودان وتونس وغيرها
أتمنى أن أكون مخطئا، ولكن هذا ما أراه

د.وليد said...

كلامك يا إبراهيم((وللأسف الأيام القادمة ستثيت أن ما فعلته حماس سيكلفنا جميعا الكثير، وسيؤخر القضية أشواطا كثيرة))
أثار مخاوف وهواجس كثيرة فى نفسى
وفى نفس الوقت الوضع اللى كان فى غزة من اقتتال كلما كان يطول كان الحال يزداد سوءوأعتقد أنه أكثر خطورة من الوضع الحالى اللى هوسيطرة حماس على غزة
وبعدين حماس كانت ممكن تعمل إيه فى وضع هى فيه الحكومة وعليها مسؤلية أمام الشعب
وهناك فصيل منفلت يستهدف المجلس التشريعى ورئيس الوزراء!!!
ويعمل فى اتجاه أجندة أمريكية لزرع الفوضى وكسر شوكة حماس نيابة عن إسرائيل
وأعتقد أنه لم يكن هناك أحد من الأطراف يتخيل ماحدث وهو أن تجرى الأمور لصالح حماس بهذا الشكل
والدليل على ذلك هو السفر العاجل لأولمرت لأمريكا ثم بعد ذلك دعوة مبارك لأولمرت وعباس وملك الأردن فى مصر
نقطة أخرى هناك فتحاويين كانوا فى جانب حماس ويعتبرون أن حركة فتح يسيطر عليها مجموعة بعينها لا تعبر عن كثير من أعضاء الحركة ولعلك تكون سمعت عن الحركة الوليدة فتح الياسر التى تضم فتحاويين منشقين عن تيار فتح المسيطر
أخيرا أدعو الله أن ما حدث يكون فيه الخير للمسلمين ولنصرة فلسطين
ويا ريت يا إبراهيم تكون فيه تدوينة عن تصورك لما سيحدث وطبيعة الأضرار كما تراها...وإن كنت اتمنى كما تمنيت أن تكون مخطئا...
نقطة أخيرة بعض تعبيراتك أزعجتنى زى:
((وأنا لا أهتم أن أخسر أحد بسبب المدونة))،
((ويا عم أنا مش مستني حبك، حبني ولا متحبنيش مش فارقة))
بالراحة شوية بلاش الغضب ده

Anonymous said...

انته شكلك اتغرييت فى نفسك قوى بقا انته عارف اكتر من كل من قالوا ان الذى فعلته حماس هو الصيح دا الجبهة الشعبية لتحرير فلسطين قالت ان لم تفعل حماس هذا لكانت غزة على مشارف حرب اهلية
طريقتك فى الرد على التعلييق غير صحيحة وغير موزونة انت اظهرت للقراء انك لاتستطيع ان يخالفك احد فى المدونة انت لايوجد عندك مبدأ سماع الرأى الاخر رأيك اللى بتاخدة اول مرة لاتتنازل عنة
انت وان لم يهمك هذا فأنت نزلت فى نظر الكثيير بسبب ردك المتهكم هذا
أ.ابراهيم ارجو مراجعة نفسك
ارجو الاتقسو على من يضحون بانفسهم وكل شئ بسببنا ون اجلنا ومن اجل اسلامنا
ارجو ان يكون ردك افضل من هذا
واحد تانى كان بيحبك برضو

Anonymous said...

انا متأكد وان كنت اريد الا تفعل هذا
انك سوف تفعل بعد الهجوم عليك فى ردود المدونة احد الخيارين
1- تلغى الردود الا بعد اعتمادها من قبلك
2- ان تلغى الردود اساسا او تلغى المدونة وتعيش فى احباط بسبب الغائها
راجع نفسك

Anonymous said...

whever i see two muslims different in their opnion i found them talking with eachother in a very bad way , why is that ????? be different in opnion but respect eachother while talking . if we muslims didnt respect eachother , other ppl ll never respect us. wala eih !!!
im saying this for the last 2 comments before me & for ibrahim as well . Dis-agree about eachother opnion but be smart when saying this for others to listen & respect u .

إبراهيم الهضيبي said...

الأخ المجهول اللي كان بيحبني ممكن يكون أشجع من كدة أدبيا ويعرفني بنفسه
الدكتور وليد: أحترم ما تطرحه ولكني أختلف معه، فالوضع الان في غزة أن حماس والشعب محاصرون هناك، وستدهم إسرائيل دكا من دون حتى أي تدخل أو إادنة عربية، وأتمنى أن أكون مخطئا، ولكن هذا سيحدث قريبا
الأخ الاخر المجهول، برضه برجاء أن أرى شجاعة أدبية في التعريف بنفسك، وإذا كنت ترى أن الأمر فضحني فهذا رأيك، ولني أصر على أنني أكتب لا طلبا لحب أو رضا أي احد غير الله، وبالتالي سأكتب ما أراه صحيحا، لا ما يستميل الناس عاطفيا بسبب تعاطفهم مع حماس
ونعم أنا أعرف الكثير عن هذا الأمر، وليس هذا المجال الذي أخبرك فيه لماذا وكيف أعرف الكثير، وعفوا فكون ما حدث تصرف خاطئ ليس حتى رأيي وحدي، ويشاركني فيه الكثير ممن هم أساتذتي
والنسبة لإني هحذف التعليق فأنا لم اضطر لفعل ذلك سوى مرة واحدة حين احتوى تعليق على سباب، أما سوء الأدب فأحتمله
واستطيع تقبل الخلاف في الرأي، ولكن الذي لا يستطيع تحملة هو من لا يحب من يختلف معه، فيقول له (واحد مان بيحبك)، ويتهم مخالفه الغرور والكبر صراحة، مع أننا تعلمنا (أن يعذر بعضنا بعضا فيما اختلفنا فيه)، على العموم أنا إن كنت لا أعرفك لأنك اخترت أن تبقى مجهولا فإنني من دون شك سأتعرف عليك يوم القيامة