Thursday, July 05, 2007

اللي جاي

السلام عليكم أولا أنا كنت كاتب مقالة مطولة عن تفعيل مقاصد الشريعة، نشرت في العدد الجديد من مجلة المسلم المعاصر (العدد 123)، فاللي هيقراها مينساش يقوللي رأيه، مش عارف إذا كان ينفع أعيد طبعها هنا ولا لأ، بس على كل حال هي طويلة شوية على المدونة، فممكن أقسمها أو أختصرها تاني حاجة أنا كان في مجموعة مقالات كاتبها من زمان، قررت أنشر بعضها على المدونة، فبإذن الله كلها كام يوم وهانشر أول واحدة، وهي عن أزمة المرور في مصر، بس من منظور سياسي واجتماعي، برضه طويلة شوية بس أقصر من اللي اتنشرت تالت حاجة أنا مستمر إن شاء الله في المراجعات، وباقي كام نقطة، منهم نقطة هامة جدا تحدث عنها الدكتور القرضاوي في حلقة هذا الإسبوع من الشريعة والحياة، وهي في أدب الاختلاف، وكيفية التعامل مع المخالفين، حتى لو كنت أظن أن ما يقولونه مناف للدين، ولا يصب في المصلحة، ومنها نقطة أو اتنين كمان، ولكن فعلا أنصح بمشاهدة الحلقة، أو قراءتها، وأظنها تنشر على موقع الجزيرة بعد الحلقة، بس مش متأكد بصراحة رابع حاجة أنا لسة فاضللي كام شخصية برضة أثروا في حياتي عايز أكتب عنها، حتى الان كتبت عن الدكتورة هبة رؤوف، والدكتور عماد شاهين، والمستشار البشري، وباقي كذلك 3 أو 4 شخصيات بإذن الله خامس حاجة أنا مشغول شوية الأيام القادمة، فأنا دايما عمال تدوينات (استبن) فقد أستخدم بعضها (يعني هي حاجات أنا كاتبها من فترة ولم أنشرها بعد) وقد لا أجد وقتا لذلك، فمعلش اعذروني، وادعولي سادس حاجة وأهم حاجة جلسة المحكمة العسكرية قربت جدا، والنظام يراهن على قصر النفس بتاعنا، وعلى إنه بعد كام شهر الموضوع بينام إعلاميا، ونحن بإذن الله لن ننام، وسنظل نقاوم الظلم أينما وجد، وسنستمر في فضح نظام الشورى المزروة، والاستفتاء المزور، المحاكمات الظالمة، والعبارة الغارقة، والنواب المضروبين، والمبيدات المسرطنة، والدم الفاسد، والمليارات المنهوبة، والوساطات اللا متناهية، والرشاوى والفساد الاداري عايزين نفسنا يبقى أطول من نفس النظام الفترة للي فاتت قضية الحرية والتنمية (وهي القضية الأساسية والأكثر أهمية في مصر) تقدمت للأمام خطوات بسبب تجاوز الكثيرين لخلافاتهم السياسية ووقوفهم في خندق واحد أمام الظلم، بسبب تخلي البعض عن السلبية ونزولهم إلى الشارع، وإلى ساحة رفض الظلم والفساد، والدفع بعجلة التنمية بفضل الله، حققنا بذلك مكاسب كثيرة، قد لا يراها البعض رأي العين، ولكن ثمارها بإذن الله قادمة في القريب العاجل بس لسة اللي جاي أهم من اللي فات وأصعب وأشق ولكن...نحن بإذن الله (وأقصد بنحن الإخوان والإشتراكيين والثوريين، والليبراليين الشرفاء، والقوميين الشرفاء، والمواطنين غير المأدجين والذين حركهم الظلم) بإذن الله سنكون أطول نفسا

4 comments:

يلا مش مهم said...

عمي
صاحبي
حبيبي
اخبارك ايه يا ولدي في الغربة وعاملة ايه فيك حياة العزوبية
المهم ياخالي
هتكلم صعيدي
اول هام لازم تعرف اننا كلاتنا في مصر بندعيلك وبنجول يا رب يرجعلنا بالسلامة من غربته وتحفظه من نساوين الفرنجة وعمايلهم
تاني هام وحشتنا جعدتك وكلامك الزين اللي كنت بتجعد طول الليل تجولوه
تالت هام
فاتك نص عمرك يا ابو خاللو
العيال بتوع الاهلي ظبطوا الزملكاوية صح وبيجولوا في مصر ان لاعيبة الزمالك طلعوا الجبل وانضموا للمطاريد وعن جريب هاييجوا حدانا ويستخبوا من الفضيحة
رابع هام
تحية كبيرة ليك علي التدوينات اللي هاتبدا تنشرها وايوة كدة هي دي المرجلة والجدعنة يا صاحبي
ومستنين منك انسنة الحركة الاسلامية
ولو عندك وجت فاضي ابجي خش عندي وهتلاجي حاجة تعجبك جوي جوي جوي
ويللا مش مهم

saad alshater said...

شفت مدونتي الجديده؟؟
ادخل وقول رأيك
wwww.ibn-elshater.blogspot.com

شباب بيحب اسلامه said...

فعلا شئ مهم ان الواحد يقرأ عن الخلاف ويعرف الخلاف ينفع في ايه ومينفعش في ايه وان شاء الله هيكون نفسنا طويل باذن الله

elbahr said...

بسم الله الرمن الرحيم
ربنا يعينك ويقويك يا سيدي
تحياتي
ننتظر زيارتكم
البحر
www.ana-elbahr.blogspot.com