Wednesday, August 22, 2007

حمد الله على السلامة

والله الواحد اليومين دول نفسه مسدودة عن كل حاجة
الحمد لله مفيش يأس
وإن شاء الله مش هيبقى في يأس
وهناك أسباب كثيرة لعدم اليأس
منها قول الله
ومالنا ألا نتوكل على الله وقد هدانا سبلنا، ولنصبرن على ما آذيتمونا وعلى الله فليتوكل المتوكلون
إلى قوله
واستفتحوا وخاب كل جبار عنيد
ومتفائل لإني عارف وشايف إن في ثقافة جديدة بتنتشر بين الإخوان في رفض الإعتقالات ومقاومتها، وهتكلم عنها قريب لإني حاسس الناس محبطة شوية زيادة عن اللزوم
بس نفسي مسدودة من الظلم، ومن الكدب، ومن شهادة الزور
نفسي مسدودة من الناس اللي ملهاش حد
الظلم عندها مالوش آخر
البلد هتخرب على دماغهم وبيقولوا عليا وعلى أعدائي وبيضغطوا في الظلم علشان تخرب على كله
بس والله في وسط ده كله جالى خبر فعلا فرحني
كنت بتكلم مع حسام الحملاوي على الإيميل، بنشوف إيه اللي ممكن يتعمل في القرف اللي إحنا فيه ده
لاقيته بيقوللي ممكن تكلم الدكتورة رباب المهدي تاخد رأيها، هي خلاص رجعت مصر بعد رحلة العلاج
أنا لو قعدت أتكلم عن الدكتورة رباب، واللي بتعمله علشان رفع الظلم عن المعتقلين، مش هوفيها حقها
كفاية أقول إنها بتدافع عنهم وهيا مختلفة معاهم في الرأي أكتر ما كتيييييييير من اللي متفقين معاهم بيدافعوا عنهم
بس أنا مش عايز أتكلم عن الدور السياسي للدكتورة رباب، أنا عايز بس أقول إنها فعلا إنسانة كويسة جدا، وحرصة على الناس اللي تعرفهم، وقضايا بلدها فعلا عايشة جواها
أنا مش عارف أقول إيه، بس أنا فعلا فرحان الحمد لله
أول لما عرفت مسكت التليفون وكلمت الأخت رباب، مردتش عليا فكلمتها كذا مرة
في الاخر بعتتلي رسالة تقوللي إنها مينفعش ترد على التليفون لفترة كدة، بس هي الحمد لله في القاهرة
بجد يا دكتورة رباب ودكتور سامح: حمد الله على السلامة
وإن شاء الله أشوفكو على خير وتعزموني على الغداء (أنا قلت شاي والله بس هي رباب قالتلي غداء) لما أرجع مصر

5 comments:

asmaa ibnatalislam said...

السلام عليكم
رغم ان حضرتك مش بترد علي التعليقات بس انا برضه هقول تعليق صغير
بسم الله الرحمن الرحيم( والله غالب علي امره ولكن اكثر الناس لا يعلمون

أنسانة-شوية وشوية said...

بصراحة اوقات كتير لما بشوف الظلم من كل الناس لبعضها كل علي قدر مكانه بحس ان مفيش امل وارجع تانى اقول لا لازم يكون فيه امل ده اكيد وانا بقرأ كتاب المغفور لها بإذن الله تعالي زينب الغزالي ايام في حياتى حسيت ان لازم يكون فيه امل وبالفعل تحضرنى الآيه الكريمة"إن يمسسكم قرح فقد مس القوم قرحاً مثله""ولا تهنوا ولا تحزنوا وانتم الاعلون" محتاجين ايه بقي بعد كده.
زمان كنت فاكرة ان مينفعش ادافع عن حد وانا مختلفة معاه بس من فترة قصيرة غيرت راي في الموضوع ده وانت بحديثك عن الدكتورة رباب اكدت لي المموضوع ده.

ومضات .. أحمد الجعلى said...

ربنا يكرمك يا إبراهيم واحشنا كتير فعلا

وبصراحة حبيت بعد أن أضم صوتى لك بعدم اليأس واستمرار العمل والبذل إلى أن يشرق الفجر

حبيت بعدها احييك على هذه الروح العالية تجاه كل من تكن لهم تقدير واعتراف بالجميل، هذه الروح التى أصبحت كالعملة النادرة، وأسأل الله لك ولهم حياة سعيدة ومزيد من العطاء

وحمد الله على السلامة يا دكتورة رباب

AN ELAWAN said...

الحقيقة زرع الامل مطلوب بس هو محتاج من الانسان انه يقويه بمزيد من العمل مزيد من الجهد لانه عامل زى الشجرة اللى لازم نرويها ديما
نرويها حب لله
نرويها حب للخير
نرويها حب للناس مهما كان اتجاهم
نرويها حب للناس مهما اختلفنا معاهم

شقاوة شعب said...

جزاها الله خيرا دكتورة رباب على جهدها فى رفع الظلم عن الناس

وبجد احترم اى شخص يحترم الانسانية ويعطى لها قدرها ايا كان فكره