Friday, July 06, 2007

غسلت

هو الموضوع غريب شوية أنا عارف، بس دي أول مرة في حياتي أشغل الغسالة وأغسل
ربنا يخليهالي أمي في مصر، فعلا، يا عيني عالأم وحنان الأم
بس أبوظبي بقى حاجة تانية
بقالي كام يوم شايل هم الموضوع ده
وعمال أأجل،وكمان مفيش وقت أوي وأنا بتحجج بالموضوع ده
بس المضطر يركب الصعب
النهاردة اتخذت القرار، ونزلت اشتريت مساحيق غسيل،وأنا راجع من الشغل (أيوة النهاردة الجمعة وراجع الساعة 11، ظلم الرأسمالية بقا) وكلمت واحدة بتشتغل معايا أسألها أجيب مسحوق إيه، ورجعت على الأوضة قريت دليل المستخدم بتاع الغسالة، وحطيت الحاجات، وأهي شغالة دلوقتي،ادعولها بالسلامة
إن شاء الله لو الأمور مشيت كويس هكلم أمي أقولها
وإن تعدوا نعمة الله لا تحصوها، إن الإنسان لظلوم كفار
النعمة الواحدة، لا تحصى
ملحوظة: أرجو ألا تدور التعليقات في هذا الموضوع حول نفس ما دارت حوله في التدوينات السابقة، وأتمنى أن تقتصر علي
1- التهاني بالغسيل الأول
2- الإطمئنان على حالة الغسيل بعد النشر
3- نصائح لمسحوق أفضل، نصائح حقيقية مش إعلانية من بتاعت جمع أربع أغلفة وابعتهم على ص.ب 109
4- أي حاجة تانية ليها دعوة بالغسيل، يعني الناس اللي بتغسل أموالها في تجارة مخدرات، الكلام اللطيف بتاع المزاج ده
5- نصائح للغسيل القادم، من حيث الكمية، الحاجات اللي تتحط مع بعض، والذي منه
6- أي حاجة تانية مالهاش دعوة بالإخوان ولا السياسة ولا عيلتي ولا ميكي ماوس البقال اللي كان جنب بيتنا وقفل مش عارف ليه
تحديث: الحمد لله، العملية نجحت، خلصت الغسلة الأولى بنجاح، عملت زي ما محمود سعيد قاللي بالضبط، نشرت:)

7 comments:

يلا مش مهم said...

ابراهيم
انا كنت ناوي وانا بعلق علي تدوينة المرور في مصر اني اعلق علي المجهول اللي بيدخل بدون اسم وبيشتت الناس بس قلت ان اسلم حاجة مع المجهول ده انك تطنشوه وتدع القافة تسير والمجهول يعوي
وفعلا لم اذكره باي شئ وكنت اتمني الا تلتفت له انت مثلي وان تسير في طريقك وتدع المجهول يعوي ويلطم ويصرخ والا يشغل اي مساحة من تفكيرك
ولكنك رددت عليه
وانت هكذا اشبعت رغبته في الحصول علي الاهتمام وكان من الاصلح ان تدعه وتمل طريقك
ولكن معلش مرة تفوت ولا حد يموت
ارجوك دعهم ودع تعليقاتهم وصدقني هايختفوا من عندك لانهم غير قادرين علي المواجهة العلنية
وبالنسبة للغسيل فالف مبروك يا صاحبي
علي استعمالك للغسالة وبعدين ده تدريب كويس علشام الجواز او الحبس
لانك في الحالتين بتغسل
ويللا مش مهم

Anonymous said...

nas7ty leek eb3ed 3an el ghaseel laeno baa modet adya gdeeda el ayam dee we a7kamha kbeera we 7agat e7na msh adha webzat e7na el sha3b el massry el gaban el msh fal7 ela fel klam we day3a we mtbhdel bsbb salbyto fa mn el akher ya sa7by sam7ny fel lafz 3esh mota3fen ka aghlab al masreeyen waln akoul kolhoum afdal mn an taghsel wa 3ozran laany fe balad agnby la ytwafar lee keyboard 3araby we shokran lak 3ala modwantk al motamyza alty tanoum 3an shakhss karouaa mothakaaf

jowayreya said...

salamu 3alaykom,
i totally agreee with 2ostaz magdy,

محمود سعيد said...

المشكلة انك على ما فهمت عاوز اللى يعلق يهزر لكن الموضوع لازم يقلب بجد

بس بما اننى خبير فى موضوع الغسيل :-)
المسألة وما فيها أنك تحط الغسيل فى الغسالة
تشغل الغسالة
تطلع الغسيل
تنشر الغسيل
تلم الغسيل

بس كده :-)
من غير أتفزلك
لأن الغسالة هى اللى بتغسل :-D

محمد النجار said...

الف مبروووك نجاح العملية يا اخ ابراهيم وعلى فكرة يا أخ محمود حضرتك نسيت اهم واصعب مرحلة من مراحل الغسيل وهى مرحلة الكى الا بقى اذا كان عندهم مكوجى هناك زى عندنا كدة الموضوع ده بقى هو يأكدهولنا
سلام

دعوة الفردوس said...
This comment has been removed by the author.
دعوة الفردوس said...

سبحان الله انا قريت تدوينة حضرتك وكانت ماما لسه جنب مني بتقولي قومي نامي كفايه زفت"على النت يعني :D

وقومي نامي علشان في هدوم كتير عايزه تتغسل الصبح

فبالتاكيد هعيش معاناة حضرتك بكره

بس المهم دلوقت تطمنا
بعد الغسيل
ياترى في اي حاجه حالتها اتغيرت يعني من قطن لكتان او وبره او خلافه؟
وياترى في تمازج الوان حصل بما ان مفيش راجل بيغسل الا ويحط حاجه ملهاش لازمه في النص يكون لونها احمر مثلا تخلي القميص البفته احلى حمار
وياريت تقروها صح حمار من الاحمر

و خد بالك بقى من النشر دي بالذات ولاا نص اللي غسلته هيكون في عداد المفقودين لو محطيتش المشابك كويس

و ياريتك كنت كتبتلنا اسم المسحوق و احساسك بالتجربه يمكن كانت نفعتني بكره مع انها مش اول مره

بس خد نصايح بجد
حط الهدوم البيضاء تماما مع بعضها الاول
وبعد كده الهدوم الفاتحه مع بعضها
وبعدين الغامق سوا بقى
وفتش الجيوب قبل ماتحط حاجه في الغساله
وايه تاااااااااني
اه في هدوم معينه لما تتغسل في الغساله الاوتوماتيك بتكش وتتكسر وتبوظ زي القطنيات يعني لو تي شيرت قطن هيمط
وهتعيش بحسرته لا قدر الله زي ماحصلي ماهدوم بحبها

يااخي ليا كلمه اخيره ومعلش لو طولت

اوعىىىىى تغسل اي بنطلون او تي شيرت وهو فيه فلوس
الحكايه مش ناقصه غسيل